ABO tambe por yuda promoshoná Kòrsou na New York e fin di siman akí!

WILLEMSTAD- 24 di yanüari 2017 –Ofisina di Turismo di Kòrsou (CTB) ta bai partisipá próksimamente na e New York Times Travel Show ku lo tuma lugá di 27 pa 29 di yanüari 2017. New York Times Travel Show ta un di e èksponan turístiko mas importante di Norteamérika; su públiko ta úniko, ku representante di e merkadonan di turismo mas importante na mundu, manera Áfrika, Asia, Australia, e region Pasífiko Sur, Canada, Karibe, Europa, Mexico, Sentroamérika, Suramérika i Estádos Unídos.

Mas di 500 ekspositor for di mas di 150 pais ta partisipá na e èkspo akí, inkluyendo algun ofisina di turismo nashonal i internashonal, destinashon, liña di krusero, tour operator, hotèl/resòrt i otro kompanianan ligá na biahamentu. Ademas, e Travel Show ta risibí mas di 6.000 profeshonal di sektor turístiko, mas di 600 profeshonal di medionan di komunikashon i mas di 15.000 konsumidó.

Despues di e éksito ku Kòrsou tabatin na 2016 ku e brelnan di realidat virtual (VR goggles) i di a risibí e premio pa e stènt di mas kreativo na e èkspo, CTB ta preparando pa otro tremendo aktividat interaktivo e aña aki.

Na e stènt di Kòrsou, ta bai krea un ‘Mosaiko di Kòrsou’, un imágen di 2,4 m x 1,7 m di nos famoso Handelskade. E mosaiko lo konsistí di un kantidat di potrèt ku personanan individual lo saka e fin di siman aki i publiká riba nan kuenta públiko di Instagram ku e hashtag #RightNowInCuracao.

CTB ke invitá bo pa yuda krea e imágen promoshonal úniko akí.

Esei ta bai di e siguiente manera:

  1. Saka un potrèt di bo mes òf di bo ambiente na Kòrsou
  2. Subi e potrèt riba bo Instagram i ‘follow’ nos na @CuracaoTB entre djabièrnè 27 di yanüari pa djadumingu 29 di yanüari 2017.
  3. Tag #RightNowInCuracao

E potrèt ku bo manda lo aparesé riba e imágen promoshonal di Kòrsou, pa mustra New York kiko ta pasando ‘Right Now’ (Awor Aki) na Kòrsou. Djadumingu dia 29 di yanüari 2017, lo presentá e mosaiko kompleto i definitivo na final di e New York Times Travel Show. Unabes ku e evento ta tras di lomba, lo manda e mosaiko Kòrsou.

Djòin CTB i mustra New York kiko ta pasando ‘Right Now in Curaçao’!