Aerolineas MAS ku buelo inougural pa Kòrsou

WILLEMSTAD- 28 di òktober 2014 – Kòrsou su iterinario di buelo ta konosé otro kresementu positivo. E biaha aki Ofisina di Turismo di Kòrsou (CTB) ta yama bon biní na Aerolineas MAS ku lo tin buelo direkto entre Repúblika Dominikana i Kòrsou. Manera ta e kustumber a tene un resepshon ofisial kaminda a yama e crew i tim di maneho di Aerolineas MAS bon bini. Na e okashon aki a hiba palabra Minister di Desaroyo Ekonómiko, sr. Stanley Palm i sr. Manuel Férnandez di Aerolineas MAS.

Aerolineas MAS su ofisina prinsipal ta na Ciudad Universitaria na Santo Domingo. E buelonan di Aerolineas MAS ta keda operá for di aeropuerto internashonal La Isabela (Joaquin Balaguer). E kompania a wòrdu fundá na 2005 komo un kompania di charter i ta transformando su mes den un kompania di buelo regular. E flota di Aerolineas MAS ta konsistí di dos avion britániko Aerospace Jetstream 32 i un avion Cessna 206.

Ofisina di Turismo di Kòrsou (CTB) ta kontentu ku e kresementu den airlift entre Kòrsou i Repúblika Dominikana. CTB i Curaçao Airport Partners ta felisitá gerensia i tripulantenan di Aerolineas MAS ku nan promé buelo pa Kòrsou.