Agentenan di biahe di Canada impreshoná ku Kòrsou

Willemstad – 18 di yüli 2016: Resientemente Ofisina di Turismo di Kòrsou (CTB) a risibí un delegashon grandi di e mihó agentenan di biahe pa Air Canada Vacations (ACV). Meta di esaki tabata pa sigui promové Kòrsou i tambe e produktonan ku ACV ta ofresé. Ku e bishita di orientashon aki CTB kier logra pa e agentenan di biahe tòp ta mas mihó informá di loke Kòrsou tin di ofresé.

E agentenan di biahe i representantenan di ACV a forma parti di vários aktividat. Nan a bishitá Playa Kenepa i a hasi un rekorido ku guia den sentro di siudat Willemstad ku asistensia di Funbini Taber Tours. E grupo a realisá tambe un tour den boto pa sera konosí ku Spaanse Water kortesia di Bounty Adventures. Tambe e programa a inkluí bishita na Hilton Curaçao, Lions Dive & Beach Resort, Lodge Kura Hulanda Resort, Papagayo Curaçao i Renaissance Curaçao Resort & Casino.

E agentenan di biahe i e representantenan di ACV a keda impreshoná ku Kòrsou i tabata di opinion ku nos tin hopi di ofresé na e turista kanades. CTB lo kontinuá ku su esfuersonan pa informá agentenan di biahe ku e propósito pa yuda nan sigui bende Kòrsou komo e destinashon faborito den Karibe na potensial bishitantenan for di Canada. Na desèmber próksimo lo inisiá tambe e terser buelo semanal di Air Canada Vacations pa Kòrsou. Bishitanan di orientashon manera esun di Air Canada Vacations (ACV) ta únikamente posibel ku kolaborashon di partnernan den industria. Un danki spesial na ACOYA Hotel Suites & Villas, Avila Beach Hotel, Blue Bay Curaçao, Kunuku Aqua Resort, Floris Suite Hotel, Santa Barbara Beach & Golf Resort, Sonesta Kura Hulanda Village & Spa i Sunscape Curaçao Resort, Spa & Casino pa nan kontribushon na realisashon di e bishita di orientashon di e agentenan di biahe di ACV.