Apertura kompleho nobo na Parke Nashonal Shete Boka

...Pa aña un promedio di 60 mil persona ta bishitá e parke...
WILLEMSTAD- 31 di mei 2015:Den un ambiente ameno Ofisina di Turismo di Kòrsou (CTB) huntu ku Carmabi a hasi apertura ofisial di e kompleho ku a keda trahá resientemente riba tereno di Parke Nashonal Shete Boka. Ta trata aki di un kompleho ku ta konsistí di un área pa bende entrada/duna informashon i un fasilidat di tualèt nobo. Meta di e proyekto tabata pa halsa e kalidat i servisio ku ta keda duná na e bishitantenan lokal i internashonal di Parke Nashonal Shete Boka. Na e apertura a hiba palabra sr. Stanley Palm, Minister di Desaroyo Ekonómiko, sr. Faisal Dilrosun, representante di Minister Whitemandi Salubridat Públiko, Medio Ambiente i Naturalesa, i sr. Paul Stokkermans, direktor di Carmabi.

Parke Nashonal Shete Boka a keda establesé komo parke di naturalesa na 1994. Esaki despues di un kantidat di dokumentu di maneho indikando e nesesidat pa protekshon di turtuganan i e nesesidat for di sektor turístiko. Parke Nashonal Shete Boka ta un di e atrakshonnan turístiko hopi gustá bou di e turistanan ku ta bishitá nos isla. Pa aña un promedio di 60 mil persona ta bishitá e parke, esaki ta mas òf ménos dòbel di e kantidat ku ta bishitá Christoffelpark ku ta otro parke bou di maneho di Carmabi. Mirando e kantidat di bishitante, ta hopi importante pa e fasilidatnan ku ta keda ofresé na e públiko lokal i internashonal ta optimal. P’esei CTB den su afan pa yuda desaroyá nos áreanan turístiko a traha huntu ku Carmabi na realisashon di e proyekto aki.

Den pasado CTB a konstruí 2 toren di vigilansiaku ta ubiká riba tereno di e parkei banda di esei CTB ta duna su aporte pa loke ta trata e parti di seguridat riba e área. Pa 2015 CTB huntu ku Carmabi ta trahando riba mas proyekto ku e meta pa sigui halsa e nivel di servisio na e parke.