Aprel 2016 a krese ku 3%

WILLEMSTAD- 8 di yüni 2016 – Sifranan preliminar kolektá pa Ofisina di Turismo di Kòrsou (CTB) ta indiká ku pa luna di aprel 2016 a registrá un kresementu di 3%. Esaki ta un total di 1.218 turista adishonal. Un total di 37.425 turista di estadia a keda registrá kompará ku 36.207 turista na mesun luna aña pasa. Esaki ta komo resultado di e kresementu di 12% na luna di aprel 2016 for di region di Europa. Un kantidat di 1.895 turista adishonal a keda registrá for di e region aki kompará ku e mesun luna aña pasa.

Merkado di Europa ta representá un kantidat signifikante di 47.8% di tur bishitante na luna di aprel 2016. Aña pasa esaki tabata 44.2%. For di e region aki Kòrsou a risibí 17.904 turista kompará ku 16.009 na aprel 2015. Hulanda, e pais for di kua nos ta risibí mas tantu turista a nota un kresementu di 17% ku un total di 14.130 turista na aprel 2016 kompará ku 12.094 na 2015. Alemania a registrá 37% mas turista na luna di aprel. Un total di 1.991 turista a keda registrá. Aña pasa mesun luna a registrá 1.451 turista aleman.

Region di Sur Amérika a krese ku 7% ku un total di 9.377 turista di estadia kompará ku 8.777 na 2015. E kantidat di turista for di Venezuela a konosé un subida bèk, registrando un kresementu fuerte na luna di aprel 2016. For di Venezuela un kresementu di 24% a keda registrá ku un total di 6.141 turista di estadia kompará ku 4.946 na aña pasa. Un análisis mas profundo ta mustra ku solamente 24% di e turistanan for di Venezuela a keda na un akomodashon registrá miéntras ku aña pasa e kantidat aki tabata 42%. Brazil i Colombia tur dos a konosé bahada di 12%, miéntras ku Sürnam a registrá 28% ménos turista.

Turismo di estadia for di Nort Amérika a registrá un bahada di 12% na aprel ku un total di 6.360 kompará ku 7.205. Estado Unídos a registrá un total di 4.796 turista kual ta 10% ménos turista. Canada a registrá un bahada di 17% ku 1.564 turista di estadia na luna di aprel 2016. E bahadanan aki ta un refleho di e temporada abou di turismo. CTB huntu ku su partnernan prinsipal den industria di turismo ta komprometé pa sigui krese e merkado importante aki pa kual motibu ta vigilando e prestashon di e merkado di Nort Amérika di aserka pa asina por intervení ku e táktikanan di merkadeo apropiá ora ku ta nesesario.

E kantidat di anochi ku e turista a keda riba nos pais a konosé un bahada di 3%. E úniko region ku a registrá kresementu den kantidat di anochi ta Europa. For di e region aki un kresementu di 6% a keda nota. Region di Nort Amérika, Sur Amérika i Karibe a registrá respektivamente 14%, 5% i 24% ménos kantidat di anochi kompará ku na aprel 2015. E sifranan di kantidat di anochi pa luna di aprel ta mustra ku e luna aki tambe nos a konosé mas tantu turista pero esakinan a keda ménos kantidat di anochi. E kantidat averahe di anochi ku e turistanan a keda den luna di aprel ta 7.9 anochi miéntras aña pasa esaki tabata 8.4 anochi.

Sifranan promé 4 lunanan di aña: kantidat di anochi, akomodashon i impakto ekonómiko
E promé kuater lunanan di aña 2016 ta mustrando un kresementu kumulativo di 5%. E kresementu aki por keda atribuí na e region di Europa, Nort Amérika i Karibe. E regionnan aki a krese respektivamente ku 12%, 3% i 5%. Region di Sur Amérika a konosé un bahada registrando 7% ménos turista den e kuater promé lunanan di 2016. E kantidat di anochi ku e turistanan a keda nos pais e promé kuater lunanan di 2016 ta mustra un bahada di 6%. Sifranan preliminar ta mustra un total di 1.299.720 anochi. Aña pasa e kantidat tabata 1.379.649. Europa ta e úniko merkado ku a nota kresementu durante e promé 4 lunanan di aña 2016. Un total di 767.726 anochi a keda registrá kual ta un kresementu di 3%. Nort Amérika, Sur Amérika i Karibe a registrá un bahada di respektivamente 2%, 25% i 13% ménos kantidat di anochi durante e promé 4 lunanan di aña.

For di e karchinan di embarkashon i desembarkashon por konstatá ku 56% (92.971 turista) di e kantidat total di turista di estadia a keda na un akomodashon registrá. E repartishon ta lo siguiente: hotèl di mas ku 150 kamber (27%), hotèl ku ménos ku 150 kamber (12%) i bùngalo (18%). E kantidat di turista ku a keda na otro akomodashon ta 71.986. Esaki ta representá 44% di e kantidat total di turista di estadia.

Hasiendo uso di e modelo ‘Turistika’, CTB huntu ku MEO a kalkulá ku durante e promé kuater lunanan di 2016, sektor di turismo a generá un impakto direkto di 335 mion florin pa nos ekonomia lokal. Turistanan prosedente for di Europa a generá un total di 167 mion florin kual ta 49.9% di e totalidat. Su tras ta sigui esnan for di Nort Amérika ku 83 mion i Sur Amérika ku 66 mion. E entrada generá for di e sobra turistanan a keda kalkulá na 19 mion florin.

Download e sifranan
Download e 'Tourism Insight active report'