Avior Airlines ku buelo inougural for di Valencia i Maracaibo pa Kòrsou

WILLEMSTAD- 17 aprel 2015: Entrante 17 di aprel 2015, e kompania di aviashon Avior Airlines a kuminsá ku buelo dos bes pa siman entre Valencia, Venezuela i Kòrsou i tambe riba e mesun dia for di Maracaibo, Venezuela pa Kòrsou. Avior Airlines ta bulando pa Kòrsou for di 2006 ku buelonan for di Caracas, Venezuela pues esaki lo bira un ampliashon di e skema aktual di Avior Airlines pa Kòrsou. Na yegada di e promé buelo a hiba palabra Minister di Desaroyo Ekonómiko, sr. Stanley Palm, Vice Presidente di Komersialisashon di Avior Airlines, sr. Gibson Preziuso Urbaneja i tambe CEO di Curaçao Airport Partners(CAP) sr. Ralph Blanchard.

E buelonan lo ser efektuá riba tur djaluna i djabièrnè den forma di sirkulo:

Ruta

Orario

Valencia - Kòrsou

10:00 – 11:20

Kòrsou - Maracaibo

12:20 – 12:50

Maracaibo - Kòrsou

13:50 – 15:20

Kòrsou - Valencia

16:20 – 16:40

Avior Airlines lo hasi uso di un boeing 737-200 ku un kapasidat di 108 stul. Pues esaki lo nifiká un kantidat di 432 stul pa siman. Venezuela ta un merkado importante pa Kòrsou for di kua aktualmente nos ta risibí kasi 100 mil turista pa aña. Pa loke ta trata e promé kuartal di 2015 e merkado aki a konosé un kresementu di 47%.

CTB i CAP ta yama Avior Airlines un kaluroso bon bini i ta spera di por konta ku un fluho di turista kontinuo for di Valencia i Maracaibo.