‘Blue Monday’? No na ‘Dushi Kòrsou’!

...CTB ku kampaña na Hulanda pa gana pasashi pa bishitá Kòrsou...
WILLEMSTAD- 17 di yanüari 2016Djaluna 18 di yanüari ta ‘Blue Monday’, konsiderá komo e dia internashonal mas depresivo di henter aña pero no na Dushi Kòrsou. Kòrsou ta konosí komo e isla di mas alegre den henter Reino Hulandes kaminda ku tur hende ta biba ku positivismo. Pa e motibu aki mes 4 di kada 5 yu di Kòrsou no konosé ‘Blue Monday’, esaki di akuerdo ku investigashonnan realisá dor di NovioData bou di 533 persona ku a partisipá na un enkuesta resientemente na Hulanda i Kòrsou. E enkuesta a keda hasí bou di enkargo di Abovo Media na Hulanda. Pa kita e melankolia di ‘Blue Monday’ na Hulanda, Ofisina di Turismo di Kòrsou (CTB) a start na Hulanda riba ‘Blue Monday’ ku un kampaña pa trese un sonrisa riba kara di e hulandes. E kampaña ta dura te ku dia 28 di febrüari próksimo. Komo parti di e kampaña tin chèns pa gana pasashi pa bishita nos dushi pais Kòrsou.

E yu di Kòrsou ta mas felis ku un hulandes? Sigur ku si! Resultado di e investigashon hasí ta indiká ku e yu di Kòrsou ta duna su ‘motibu di ta felis’ un promedio di 7,7 miéntras e hulandes a skor un 7,1. Tambe e habitante di Kòrsou a skor un promedio di 7,9 pa nan manera positivo di mira bida kontrali na e hulandes ku a skor un promedio di 7,3. E motibu pakiko e habitantenan di Kòrsou na opinion di e respondente Hulandes ta mas felis ta debí na e klima tropikal ku nos ta biba aden kual no tin na Hulanda (80%), ménos stress (69%) i e manera trankil ku e hendenan di Kòrsou ta anda (63%). Tambe, 54% di esnan entrevistá na Kòrsou a bisa ku e klima ta kontribuí na esaki. Tur hende ku bai ku fakansi òf ta residensiá na Kòrsou sá kiko e ‘dushi way of life’ ta i esei ta trese felisidat.

Tur hende ku pensa riba Kòrsou su playanan bunita i e awa di laman kristalino ta kontentu só nan por bira. E kampaña ta enserá pa kompartí fotonan di karanan kontentu hasiendo uso di e hashtag #HappyFaceCuraçao riba medio sosial. Partisipantenan ku kompartí un potrèt tin chèns di gana un pasashi pa nos dushi pais Kòrsou. Ku e kampaña aki CTB kier duna un buèlta positivo na ‘Blue Monday’ i e lunanan di wenter. Djis e pensamentu so riba Kòrsou por drecha un hende su dia.

E enkuesta a keda realisá dor di e ofisina di investigashon na Hulanda, NovioData. Tantu na Hulanda komo na Kòrsou a hasi uso di kalkulashonnan representativo di e populashon pa e enkuesta. Na Kòrsou a traha den estrecho koperashon ku Inter-Continental University of the Caribbean (ICUC).