Buelo inougural Rutaca Airlines for di Caracas, Venezuela pa Kòrsou

WILLEMSTAD- 28 ougùstùs 2014:- E kompania di aviashon Rutaca Airlines a kuminsá bula Kòrsou entrante 28 di ougùstùs ku buelo dos bes pa siman entre Caracas, Venezuela i Kòrsou. Kòrsou ta e promé destinashon internashonal pa Rutaca Airlines te ku awor nan tabata bula den Venezuela so. Na mes momentu Rutaca Airlines ta bira e di 4 kompania ku buelo entre Venezuela i Kòrsou. Na yegada di e promé buelo a hiba palabra Minister di Desaroyo Ekonómiko, sr. Stanley Palm i tambe Vice Presidente di Operashon di Rutaca Airlines, sr. Edwin Nuñez.

Rutaca Airlines lo bula pa Kòrsou riba djaweps i djadumingu i lo hasi uso di un boeing 737-200 ku un kapasidat di 118 stul. Brindando buelonan riba e dianan stipulá ta sigur ku lo por akomodá gran kantidat di biahero. Rutaca Airlines su base ta na Ciudad Bolivar, Venezuela. E kompania di aviashon ta konsistí di un flete di 14 avion ku ta realisá únikamente buelonan doméstiko.

Ofisina di Turismo di Kòrsou (CTB) ta mira e importansia di mas airlift entre Kòrsou i Venezuela pa e motibu ei ta sigui traha pa amplia e kantidat di buelonan pa nos isla. CTB i Curaçao Airport Partners (CAP) ta yama Rutaca Airlines un kaluroso bon bini i ta spera di por konta ku un fluho di turista kontinuo for di Venezuela.