Buelonan di Airberlin ta kontinuá despues di òktober 2017

...Buelo 2 biaha pa siman entre Düsseldorf i Kòrsou...
WILLEMSTAD- 8 di yüni 2017 – Ku grato plaser Ofisina di Turismo di Kòrsou (CTB) i Curaçao Airport Holding (CAH) ta anunsiá kontinuashon di e buelo 2 biaha pa siman entre Düsseldorf i Kòrsou. Na aprel último a keda anunsiá ku Airberlin lo stòp su servisio di buelo entre Düsseldorf i Kòrsou na fin di òktober e aña aki.

Despues di diferente reunion di negosiashon durante e último simannan, CTB i CAH finalmente a risibí e bon notisia awe mainta di Airberlin ku e buelo 2 biaha pa siman pa loke ta trata e temporada di wenter benidero lo kontinuá. Airberlin ta bulando pa Kòrsou for di aña 2011. E merkado di Alemania ta un merkado kresiente. Aña pasá Kòrsou a risibí 22.200 turista di estadia for di Alemania. Un gran parti di e turistanan aki a yega Kòrsou riba buelo di Airberlin. E aerolínea lo habri posibilidat pa kumpra ticket entrante mayan i lo informá tur operador di tour for di awe di kontinuashon di e buelonan pa Kòrsou for di Düsseldorf pa e temporada di wenter benidero.