CNSJ 2014 a kontribuí na mas turista den luna di ougùstùs

.....4% mas turista di estadia registrá......
WILLEMSTAD- 25 sèptèmber 2014:- Sifranan preliminar kolektá pa Ofisina di Turismo di Kòrsou (CTB) ta indiká ku 40.496 turista di estadia a keda registrá den luna di ougùstùs 2014. Esaki ta un total di 4% mas kompará ku aña pasa ougùstùs kaminda un total di 38.918 turista a keda registrá.

Mayoria di nos bishitantenan a bini for di e region di Europa. E kantidat aki a keda kalkulá na 37.7% di e total di bishitante den luna di ougùstùs. For di e region di Europa nos a risibí 15.268 turista di estadia. Esaki ta un oumento di 5,65%. Hulanda kual ta e pais for di kua nos ta risibí mayoria di nos turistanan a registrá un oumento di 5% ku un total di 11.686 turista di estadia.

Region di Sur Amérika a registrá 14.471 turista di estadia na luna di ougùstùs 2014, kual ta 1830 turista mas ku e kantidat registrá na ougùstùs aña pasa. Venezuela a registrá un kresementu positivo, nos a risibí un total di 9.697 turista for di e pais aki, kual ta un oumento di 23% kompará ku ougùstùs 2013. Brazil i Colombia tur dos a registrá un oumento di respektivamente 13% i 31% den kantidat di turista di estadia.

Un total di 12.7 % di e kantidat di turista di estadia ku a bishita nos pais den luna di ougùstùs ta prosedente di e region di Nort Amérika. E region aki a konosé un bahada di 19.66% kompará ku ougùstùs 2013. Region di Karibe a registrá un bahada di 9.28% na ougùstùs 2014. Miéntras Aruba si a registrá un kresementu di 7%. Nos a risibí un total di 2.206 turista di estadia for di Aruba. E kresementu aki tin di haber partikularmente ku e kantidat di bishitante for di Aruba ku a bini pa presensia CNSJ 2014.

Hasiendo un komparashon entre e kantidat di bishitante ku a yega Kòrsou 8 dia promé i riba e dos dianan di CNSJ na 2014 i e mesun periodo aki na 2013 por nota un kresementu di 12% pa loke ta trata kantidat di turista di estadia. Si wak e sifranan kolekta spesífikamente riba djaweps 28 di ougùstùs i djabièrnè 29 di ougùstùs esta e promé anochi di e festival ta mustra ku mayoria di e bishitantenan ta prosedente for di Aruba i Venezuela. Esaki ta representativo tambe pa e paisnan ku mayoria bishitante na CNSJ 2014. Un investigashon mas profundo riba e impakto ekonómiko di e festival lo keda publiká mas lat den aña dor di University of Central Florida.

E sifranan total di turista di estadia pa loke ta trata e promé 8 lunanan di aña ta mustra un bahada leve di 1% registrando un total di 287.321 turista di estadia. Region di Europa a registrá 6% mas turista ku ta representá un total di 122.888 bishitante for di Europa. Sur i Nort Amérika a baha ku respektivamente 3% i 13%. Region di Karibe a konosé un bahada di 14%, ku un total di 22.765 turista di estadia e promé 8 lunanan di aña.

Hasiendo uso di e modelo ‘Turistika’ CTB huntu ku MEO a kalkulá ku durante e promé 8 lunanan di 2014, sektor di turismo a generá un impakto direkto di 486.9 mion florin pa nos ekonomia lokal. Turistanan ku a bishita nos for di Europa a gasta un total di 226.4 mion ku ta 46.5% di e total generá e promé 8 lunanan di aña. Sigui pa turistanan for di Sur Amérika ku a gasta un total di 124.3 mion florin miéntras turistanan for di e region di Nort Amérika a gasta un total di 87.5 mion. E entrada generá for di Karibe den e promé 8 lunanan di e aña aki a keda kalkulá na 27.5 mion florin.

Pa loke ta trata e promé 8 lunanan di 2014 un kantidat total di 2.573.260 anochi a keda registrá ku ta 5% mas ku e mesun periodo na 2013. Informashon kolekta durante e promé 8 lunanan di aña for di e karchinan ku turistanan ta yena na nan yegada/salida ta ilustrá ku 67.3% di e bishitantenan a keda den un akomodashon registrá miéntras 32.7% a keda serka famia/konosí òf un akomodashon no registrá.

Download PDF