CTB anfitrion di evento na Miami pa presentá Kòrsou komo produkto turístiko

WILLEMSTAD- 31 di mei 2017 – Den kolaborashon ku The New Tropic un media importante na Miami, Ofisina di Turismo di Kòrsou (CTB) a organisá Bon Nochi: A Tropical Evening Showcasing the Island of Curaçao (Bon Nochi: Un Velada Tropikal pa Presentá e Isla di Kòrsou).

E evento akí, ku a tuma lugá na Wynwood Yard, un sentro empresarial temporal (‘pop-up’) na Miami, a konta ku presensia di mas di 1000 bishitante i a produsí mas di 640,000 klek balioso riba medionan sosial. Nos kultura kurasoleño a duna e velada un toke úniko. Tabatin muestra di Blue Curaçao i tambe un representante di CTB den su trahe di ‘Dushi Hende’ a forma parti di e totalidat.

Esnan presente por a registrá pa haña chèns di gana un trep pa Kòrsou. Pa forma parti di e rifa e bishitantenan mester a partisipá na diferente aktividat ku a tuma lugá durante e evento. Un ‘live stream’ organisá pa Creative-Lab-Curaçao den ‘the Wyn-Box’ (un edifisio estilo apartamento), a permití e bishitantenan interaktuá direktamente ku personanan ku tabata na un evento aki na Kòrsou na e momento ei. Un kabina pa saka potrèt estilo ‘freeze-motion’ a permití e presentenan e anochi ei bai kas ku un printout di #StayDushi. E partnernan, Hilton Curaçao, Papagayo Curaçao, i Santa Barbara Beach & Golf Resort tambe tabatei presente i a kompartí algun dato interesante tokante Kòrsou, i regalá algun trep pa nos dushi pais Kòrsou. E evento aki ta parti di un serie di evento i inisiativanan promoshonal pahalsa e nivel di konsiensia i krea mas tráfiko for di e merkado di Nort Amérika.