CTB a duna workshop na agentenan di biahe di New Age riba téknika di benta

WILLEMSTAD- 5 di ougùstùs - Resientemente Ofisina di Turismo di Kòrsou (CTB) a partisipá na un Road Show interesante pa agentenan di biahe ku ta pertenesé na New Age. E asina yamá ‘New Age Road Show’ a keda organisá den e format di workshop pa duna entrenamentu riba téknikanan di benta spesífikamente pa e produkto turístiko di Kòrsou. E sekshonnan a tuma lugá na e siudatnan di Uberlândia, Uberaba, Franca i na Ribeirao Preto.

E ophetivo di e ‘road show’ tabata pa oumentá e kantidat di bishitante for di Brasil pa Kòrsou. CTB a probechá kada momentu durante di e workshopnan pa oumentá kuriosidat di e agentenan di biahe i den esaki duna algun tep èkstra i puntonan di atenshon ku por keda usá na momentu di bende Kòrsou komo destinashon. A duna presentashon di e akomodashonnan ku tin na Kòrsou, sitionan pa hasi kompra, a elaborá riba Kòrsou su bida nokturno, gastronomia, playanan i sitionan di buseo. E workshopnan a keda duná den un trayekto di 4 dia i a konta ku partisipashon di riba 250 persona entre nan mas ku 100 agente di biahe.