CTB a entregá award di ‘Dushi Hende’ na sr. Rignald Martinus

WILLEMSTAD- 20 di yanüari 2016 –Ofisina di Turismo di Kòrsou (CTB) a hasi entrega di un award di ‘Dushi Hende’ na sr. Rignald Martinus. E award di ‘Dushi Hende’ ta forma parti di e kampaña di ‘Dushi Hende’ ku ta basá riba 6 balor klave kualnan ta: servisial, hospitalidat, responsabilidat, integridat, honestidat i orguyo. Sr. Martinus ta traha pa Hawk Eye Security komo agente di seguridat i tin e tarea pa vigilá playa Kenepa Grandi (Playa Abou) bou di enkargo di CTB. Sr. Martinus ta hasiendo un tremendo trabou, semper e ta hasi su esfuerso pa e turistanan ku ta di bishita na e playa sinti nan mes na kas. E ta semper kla para pa bai e ‘extra mile’ pa asina duna un servisio ekselente. Tur dia sr. Martinus ta sea bini un tiki mas trempan òf ta keda despues di trabou un ratu pa pasa un basora pa asina yuda tene e aria limpi. Kada granito di nos banda ta un kontribushon na desaroyo di turismo di nos pais. Sr. Rignald Martinus, sigui ku e tremendo trabou, Pabien!