CTB a entregá Dushi Hende award na e hóben deportista Am-fièd Hernández

WILLEMSTAD – 21 yüni 2016 – Resientemente Ofisina di Turismo di Kòrsou (CTB) a duna un rekonosementu spesial na e hóben deportista Am-fièd Hernández. Am-fièd Hernández ta un hóben di 10 aña di edat ku a yega di representá Kòrsou na numeroso okashon internashonalmente den e deporte di natashon ganando diferente premio: 50 medaya di oro, 18 medaya di plata, 11 medaya di bròns i 7 trofeo pa e skor di mas haltu. Esakinan ta motibu sigur pa duna e hóben aki un award di Dushi Hende pa di e forma aki demostr’é nos apresio. Huntu ku CTB, 9 organisashon mas tambe a duna un regalo na e hóben deportista.

E hóben a risibí e rekonosementu di Dushi Hende komo apresio pa e disiplina i responsabilidat ku e tin pa ku e deporte ku e ta ehersé. Ta trata aki di un hóben ku no solamente ta destakando riba tereno di deporte pero tambe ta hasi su bèst na skol. Su mayornan a splika kon disipliná e hóben aki ta i ku e ta tuma e deporte ku e ta hasi hopi na serio. E tin amor pa loke e ta hasi. Su mayornan semper ta sostené i ta kompañ’é na tur entrenamentu pa asina por motivá nan yu pa sigui pusha bai dilanti.

Un danki ta bai na tur e organisashonnan ku a ofresé un regalo na e hóben, esakinan ta: De Jongh's Sportswear, Oporto Restaurant, Scooby Tours, 'We DO Care Foundation', Kunuku Aqua Resort, Changes Pro Sport, Curaçao Sea Aquarium, Kiwanis Piscadera i Omni Electronics. Próksimamente e hóben lo bai Merka pa sigui algun entrenamentu. Am-fièd Hernández nos ta orguyoso di bo, sigui saka kara di Kòrsou unda ku bo bai!