CTB i Boulevard a uni pa sigui halsa e nivel di seguridat den e aria

WILLEMSTAD – 24 di aprel 2015 – Resientemente direktor interino di Ofisina di Turismo di Kòrsou (CTB) sr. Hugo Clarinda i gerensia di Boulevard a tene un reunion pa asina por a diskutí puntonan relashoná ku seguridat den aria di Bapor Kibra.

Durante e reunion a para ketu primeramente riba e medidanan ku Boulevard mes ya kaba a tuma pa asina por halsa e nivel di seguridat partikularmente riba e lugá di stashoná outo. Boulevard ta un atrakshon turístiko ku turistanan di estadia i krusero ta gusta bishitá i asina interaktá ku nos hendenan lokal. Ta bon pa menshoná ku pa aña esaki ta sòru pa aproksimadamente 200.000 outo riba e lugá di stashoná outo.Despues di konstrukshon di Boulevard den estrecho koperashon ku e hürdónan a hasi invershonnan kuantioso den seguridat. Aki por hasi menshon di kámara ku tin ubiká i a pone mas iluminashon riba e lugá di stashoná outo. Tambe Boulevard a pone un lokalidat disponibel pa POLITUR i esaki tambe ta yuda halsa e nivel di seguridat den e aria. Lástimamente dor ku Boulevard i Mambo Beach ta hopi konosí den boka di pueblo hopi biaha insidentenan ku tuma lugá den e bisindario ta keda asosiá ku Boulevard i Mambo Beach manera tabata e kaso últimamente. Pa por sigui traha riba mas seguridat CTB i gerensia di Boulevard a akordá durante e reunion ku lo bai tuma algun medida adishonal entre otro: lo pone entrante e wikènt largu aki patruya den e aria di Bapor kibra i lo bai tuma algun medida visibel i no visibel pa públiko.

Ta importante pa remarka ku kada insidente ta unu dimas ku lo por afektá e reputashon di Kòrsou komo isla turístiko. Pa e motibu aki kombatimentu di kriminalidat i halsa e sentido di seguridat ta prioridat pa CTB, Boulevard i e negoshinan den e aria aki. Sifranan ta mustra ku 31% di e turistanan ku a bishita Kòrsou durante 2014 a bini basá riba rekomendashon di un famia òf konosí. Ta solamente si e eksperensia di e turista ta positivo lo e rekomendá un otro pa bishita nos pais. Ta p’esei e aspekto di seguridat di e turista ta sumamente importante pa Kòrsou. Ta bon pa menshoná ku na yüni próksimo lo bai tin un konferensia internashonal na Kòrsou riba e tópiko di seguridat pa pone mas énfasis riba e aspekto aki.