CTB i ICUC a entregá Minister Rhuggenaath buki riba turismo karibense

...Kòrsou tambe ta figura den e buki...
WILLEMSTAD- 15 di febrüari 2016 – Resientemente Ofisina di Turismo di Kòrsou (CTB) i Inter Continental University of the Caribbean (ICUC) a entregá Minister Rhuggenaath e buki “Contemporary Caribbean Tourism, Concepts And Cases”. E buki aki a ser produsí pa 3 outor di Karibe, esta Dr. Sherma Roberts, Dr. Mechelle Best, ámbos di Barbados i Dr. Acolla Cameron, di Trinidad & Tobago. E buki a keda entregá tambe na Presidente di Direktiva di CTB, sra. Jeanette Bonet i Dr. Valdemar Marcha, rektor-magnifikus di ICUC.

Kòrsou tambe a figura prominentemente den e buki, komo ku dos outor lokal, esta sr. Dino Daal MS i sr. Sidney Justiana MBA huntu ku MEO a kolaborá ku artíkulo pa e publikashon. Sr. Daal ku ta empleá na CTB i ta fungi komo dosente na entre otro ICUC a skirbi riba e tópiko “Tourism in the Dutch Caribbean – the Curaçao Experience”. Sr. Justiana a kontribuí ku un artíkulo riba e tópiko “The Socio Cultural Impacts of Tourism on Curaçao”.

E buki ta kontené 600 página ku informashon balioso riba vários aspekto di turismo di Karibe, skirbi for di kuater ángulo karibense, esta e eksperensia ulandes, franses, spañó i ingles. E buki ta intenshoná pa tantu studiantenan den e mundu akadémiko di turismo pero tambe pa profeshonalnan den turismo ku ta interesá pa eksplorá aspektonan diverso di turismo komo fenómeno global. E buki ta optenibel riba Internèt via Amazon.