CTB i JCI UC ta kontinuá ku registrashon

...Kompetensha di diskurso pa representá Kòrsou durante Caribbean Tourism Youth Congress...
WILLEMSTAD – 29 di yüli 2015 - Resientemente Ofisina di Turismo di Kòrsou (CTB) huntu ku JCI United Citizens of Curaçao (JCI UC) a start ku un kampaña di registrashon pa The Golden Voice of Tourism Youth Congress ku e meta pa yega na un hóben pa representá Kòrsou durante e Caribbean Tourism Youth Congress ku lo tuma lugá na òktober próksimo.

CTB i JCI UC ta en buska di un hóben dinámiko i ku hopi kurashi pa por representá nos dushi isla Kòrsou. E hóben mester ta entre 14 pa 17 aña i mester por dominá e idioma ingles hopi bon. Na momentu ku kompletá e proseso di registrashon ta risibí un orario pa ta presente na e oudishon djasabra 8 di ougùstùs 2015. Esaki ta tuma lugá na La Tentashon kuminsando for di 10or di mainta. Na e oudishon tur hóben ku a registrá ta haña e oportunidat pa demostrá entre otro nan abilidat di presentá, konosementu riba e area di turismo i tambe dominio di e idioma ingles. Lo bai tin huradonan ku konosementu i eksperensia durante e oudishon pa por selektá na final 16 hóben ku lo partisipá den The Golden Voice of Tourism Youth Congress. Pa registrashon por hasi es aki na www.curacao.com/golden-voice.

E grupo di hóben ku keda selektá ta risibí tres diferente tayer pa asina kada partisipante ta bon prepará pa e kompetensha di diskurso. E tayernan ta pa duna guia i informashon riba abilidat di presentá, abilidat di diskutí i por último pa amplia konosementu di e sektor di turismo. Durante e kompetensha partisipantenan lo kompetí kontra di otro den diferente buèlta te na momentu ku saka un ganador. E ganador apsoluto ta bira embahador di turismo di Kòrsou i lo representá nos pais na e Caribbean Tourism Youth Congress dia 23 di òktober 2015.

Pa mas informashon por bishitá www.facebook.com/uccuracao òf www.facebook.com/Dushihende. Por manda un mail tambe na goldenvoicetourism@gmail.com.