CTB i Stichting Slachtofferhulp Curaçao ta firma MoU

WILLEMSTAD- 15 di febrüari 2017 – Resientemente Ofisina di Turismo di Kòrsou (CTB) a firma un Memorandum of Understanding (MoU) ku Stichting Slachtofferhulp Curaçao. Esaki tumando na konsiderashon ku sektor di turismo ta un di e fuentenan di entrada esensial pa Kòrsou i ku e aspekto di kriminalidat por tin influensia negativo riba e kantidat di turista, nos ekonomia i e imágen di nos pais. For di 2007 Stichting Slachtofferhulp Curaçao a keda enkargá pa Ministerio di Hustisia ku e aspekto di kuido i guia di víktimanan i nan famia den kaso di delitonan i aksidentenan di tráfiko grave. Pero ta konosí ku na e momentunan aki den sierto kasonan spesífiko Stichting Slachtofferhulp Curaçao ta duna sosten tambe na víktimanan ku no ta prosedente di Kòrsou esta turistanan. Saliendo for di e puntonan ariba menshoná, un protokòl kaminda ta duna sosten na turista riba un base struktural ta algu deseabel i nesesario.

Meta di e MoU ku a keda firmá aki ta pa sigurá e kuido i guia sosial di e turistanan ku bira víktima di un delito konforme e statutonan di Stichting Slachtofferhulp Curaçao. Ta trata aki di entre otro maltrato, atrako, asesinato òf aksidente grave. Pues delitonan ku riba término kòrtiku òf largu por kousa daño físiko òf síkiko. E palabrashon ta ku asina un delito òf aksidente ku ta envolví un turista bira konosí serka CTB, CTB na su turno lo pone Stichting Slachtofferhulp Curaçao mesora na altura di esaki. Stichting Slachtofferhulp Curaçao lo trata kada kaso ku e privasidat nesesario.