CTB a lansa kampaña di konsientisashon ku enfoke riba hóben

...Dushi Hende t’ Ami; Mi ta ON!...
WILLEMSTAD- 6 di yüni 2016 –Dushi Hende t’ Ami; Mi ta ON! Esaki ta nòmber di e kampaña di konsientisashon dirigí spesialmente riba hóbennan entre 12 i 19 aña. Durante di un evento festivo a presentá e kampaña na invitadonan spesial i prensa. E kampaña di konsientisashon aki ta finansiá pa Reda Sosial, ku fondo di Gobièrnu di Kòrsou. Ofisina di Turismo di Kòrsou (CTB) tambe ta kontribuí finansieramente den e proyekto aki i huntu ku Fundashon Nos Kousa ta enkargá ku ehekushon di e proyekto. Minister enkargá ku Desaroyo Ekonómiko, sr. Eugene Rhuggenaath, Minister enkargá ku Enseñansa, Siensia, Kultura i Deporte, sra. Irene Dick den kompania di algun hóben a duna inisio ofisial na e kampaña Dushi Hende t’ Ami; Mi ta ON!

Durante di e evento festivo a lansa tambe e logo di e kampaña. E logo ta konsistí di e kurason di ‘Dushi Hende’ ku kolonan kolorido huntu ku e teksto ‘t’ Ami; Mi ta ON!’. E teksto ta para pa un hóben ku ta biba e 6 balornan di ‘Dushi Hende’ esta un hóben; servisial, íntegro, hospitalario, responsabel, honesto i ta orguyoso di por demostrá ku e ta un ‘Dushi Hende’ unda ku e yega. E kampaña di konsientisashon ta dirigí riba alsa e nivel di konsiensia bou di nos hóbennan riba e balor di turismo, stimulá mas edukashon relashoná ku tópikonan di turismo i stimulá hóbennan pa skohe despues pa un trabou den sektor di turismo.

E kampaña total ta konsistí di 6 proyekto tur dirigí pa alsa e nivel di konsiensia bou di e grupo di enfoke. E dos promé proyektonan ku ta bai start ta primeramente un kompetensia di potrèt ku lo keda kondusí riba medionan sosial i ta dirigí riba e grupo di enfoke di e proyekto. E proyekto aki ta kore di 13 di yüni próksimo pa 11 di yüli 2016. E hóben por partisipá individual òf den grupo sakando un potrèt ku ta deskribí for di su òf nan punto di bista kiko ta turismo. Komo parti di e proyekto lo rifa diferente premio atraktivo. E di dos proyekto kual lo konosé su kulminashon dia 25 di yüni próksimo ta un konferensia dirigí riba tópikonan di turismo pa hóbennan di scouting i padvinderij. Komo preparashon pa e konferensia e hóbennan di scouting i padvinderij ta asistiendo durante un periodo di 4 siman na seshonnan di informashon pa asina ta bon ekipá pa e konferensia. E konferensia lo trata diferente tópiko, entre otro: ekonomia i trabou den sektor di turismo.

Den e próksimo lunanan lo sigui diferente proyekto atraktivo mas pa nos hóbennan. Pa mas informashon relashoná ku e kampaña por subi e página di facebook: Dushi Hende. Ban sigui plama e mensahe: Dushi Hende t’ Ami; Mi ta ON!