CTB promoviendo Kòrsou durante Caribbean Latin Workshop i CTO Caribbean Roadshow

WILLEMSTAD- 9 di novèmber 2015:- Den luna di òktober Ofisina di Turismo di Kòrsou (CTB) a partisipá na dos evento turístiko ku a resultá masha eksitoso, ta trata di Caribbean Latin Workshop i e CTO Caribbean Roadshow. Tur dos evento a tuma lugá na Hulanda i a konta ku partisipashon di agentenan di biahe, komersio i miembronan di prensa. Ámbos partisipashon a brinda oportunidatnan importante pa ekshibí Kòrsou komo un destinashon faborito den Karibe.

Caribbean Latin Workshop
Esaki ta e di 4 biaha ku ta tene e Caribbean Latin Workshop organisá pa Caribbean Reflections. Ta trata aki di un evento ku tin e meta prinsipal pa informá komersio di e produkto turístiko ku área di Karibe ta ofresé inkluyendo Kòrsou. E evento a tuma lugá dianan 29 i 30 di òktober último na bordo di e barku ‘Serenity’ ku ta mara den waf na Utrecht. Durante e tayernan aki a pone atenshon spesial na komersiantenan i tambe miembronan di prensa. Un total di 110 persona tabata presente. Huntu ku Kòrsou a partisipá tambe diferente partner den sektor turístiko for di e.o. Aruba, Repúblika Dominikana, Argentina, Perú, Mexico, Barbados, Belize, Boneiru, Cuba, Panamá i Sint Maarten.

CTO Caribbean Roadshow
E enkuentro organisá pa Caribbean Tourism Organization (CTO) ta un roadshow spesialmente pa agentenan di biahe internashonal ku intenshon pa informá nan di e produkto turístiko Karibense. CTO ta e organisashon dediká na desaroyo turístiko den region Karibe i ta konsistí di 30 isla di orígen i/o nashonalidat hulandes, merikano, franses, spañó ku ta miembro i un kantidat respetá di miembronan den sektor privá. Ademas di brinda informashon, CTO Caribbean Roadshow ta enkurashá agentenan di biahe pa bende e diferente destinashonnan den Karibe, inkluyendo Kòrsou. E aña aki CTO Caribbean Roadshow a tuma lugá na restorant La Cubanita na Rotterdam i Eindhoven. Durante e roadshow dianan 26 i 28 di òktober último partisipantenan a disfrutá di un bufèt karibense miéntras nan a risibí 10 minüt di presentashon di kada partner partisipante i un seshon di ‘speed dating’ ku agentenan di biahe. E aña aki a konta ku partisipashon di 60 agente di biahe durante di e seshon na Rotterdam i 50 na Eindhoven. Banda di Kòrsou e aña aki a partisipá tambe partnernan for di entre otro: Barbados, St. Lucia, Cayman Islands, Jamaica i Boneiru.

Partisipashon na e tipo di eventonan aki ta importante pa keda promové Kòrsou komo e destinashon turístiko ku ta brinda e pakete perfekto pa bin relahá òf hasi negoshi.