CTB a realisá bishita na 4 siudat durante Canada Road Show

Willemstad – 3 di novèmber 2016 –Ku e meta pa sigui oumentá i ekspandé turismo for di Canada, Ofisina di Turismo di Kòrsou (CTB) a djòin partnernan, Air Canada Vacations, Sunwing Vacations, Travelbrands i tambe partnernan den sektor privá pa organisá e Canada Road Show kual ta tuma lugá anualmente. Esaki ta un feria turístiko ku enfoke riba duna informashon na e mihó agentenan di biahe na Canada.

E tim di Kòrsou a tene diferente programanan di benta i seminarionan edukativo na Canada. A bishitá Pointe-Claire, Waterloo, Oakville i Toronto pa promové Kòrsou komo un destinashon tòp pa e temporada di wenter 2016/2017 i pa sobra di aña. CTB a keda sostené dor di diferente partner den sektor priva, inkluyendo Avila Beach Hotel, EM City Hotel, Floris Suites Hotel, Funbini Taber Tours, Hilton Curaçao, Kunuku Aqua Resort, Lions Dive & Beach Resort Curaçao, Papagayo Beach Resort, Santa Barbara Beach & Golf Resort, Serenity Transfer & Tours i Sunscape Curaçao Resort, Spa & Casino.

Ademas di ofresé seminarionan edukativo, CTB tabata anfitrion di ‘Toronto Travel Massive’ un evento ku enfoke riba krea kontaktonan den industria di turismo i biahe; mas di 80 miembro di prensa tòp den industria, agentenan di biahe, operadornan di tour i otro ehekutivonan di importansia inkluyendo publisistanan di AFAR, USA Today, the Globe & Mail, Canadian Living, Huffington Post Canada, Travel + Escape, Reader’s Digest Canada a forma parti di e evento. Durante di e evento a tene un #RightNowInCuracao kòntèst riba medionan sosial ku tabatin un impakto di 997,000 impreshon riba Twitter i Instagram.

Ku 5 buelo nònstòp pa siman for di Toronto i Montreal pa Kòrsou, Canada ta sigui ta un di Kòrsou su merkadonan prinsipal den temporada di wenter.