CTB a start proseso pa analisá situashon di playanan despues di mal tempu

Willemstad – 4 di òktober 2016 – Ofisina di Turismo di Kòrsou (CTB) den transkurso di awe a bishitá e playanan públiko na aria di Banda Abou pa asina pone su mes na altura di e situashon despues ku orkan Matthew a pasa i tambe e bientu sùit west ku Kòrsou a hañ’é konfrontá kuné awe mardugá.

Outoridatnan a sera akseso pa diferente playa públiko den aria di Banda Abou mirando e situashon di laman brutu. E laman brutu a kousa hopi daño na nos playanan. Un análisis di e situashon ta mustra ku lo mester bai hasi diferente trabou pa pone e playanan bèk den e estado ku esakinan tabata. Playanan no ta kai bou di responsabilidat di CTB pa e motibu aki lo aserka e instansianan konserní pa por kordiná huntu e trabounan ku mester bai tuma lugá dentro di poko pa asina drecha e playanan bèk. E proseso aki lo mester start mesora despues ku e situashon di tempu normalisá mirando ku nos playanan ta forma parti importante di e produkto turístiko ku Kòrsou ta ofresé na nos bishitantenan.