CTB ta fortifiká laso di koperashon ku agensianan di biahe na New York, Washington i Baltimore

WILLEMSTAD- 4 di aprel 2016 – New York i e siudatnan alrededor ta keda e regionnan mas importante pa turismo for di Estado Unídos. Pa sostené kompanianan di aviashon i partnernan hotelero, Ofisina di Turismo di Kòrsou (CTB) a djòin ku partnernan mayorista, Travel Impressions, GOGO World Wide Vacations i partnernan den sektor privá pa organisá seminarionan edukativo pa informá nan agentenan di biahe lider den merkado tokante e produkto ku Kòrsou ta ofresé.

E tim di Kòrsou tabata anfitrion di diferente presentashon na ofisina di Liberty Travel i kantornan di AAA na Madison Avenue, Broadway i 14th Street na New York. E seminarionan edukativo i yamadanan di benta (sales calls) a kubri diferente siudat den área di New York, manera Manhattan, Brooklyn, Long Island, Westchester i New Jersey. Ademas di esaki a tene diferente otro evento informativo na Washigton, DC i Baltimore ku agentenan di biahe profeshonal di Nort Amérika (PTANA). Durante e reunionnan aki a ofresé e miembronan téknika di benta i informashonnan ‘up-to-date’ di nos produkto turístiko.

Banda di e akshonnan di benta, CTB a risibí prensa di New York na un evento spesial organisá na e siudat di Brooklyn. Meta di e evento pa prensa tabata pa krea oportunidat di kobertura pa Kòrsou na un manera dinámiko i kreativo. E prensanan ku a akudí tabata entre otro: representantenan di TravelPulse, Upscale Magazine, Orbitz, US News & World Report, Fodors, Travel Weekly, Travel + Leisure, Recommend, Social Life Magazine, Men’s Journal, New York Resident, Redbook i Women’s Day.

Un biaha mas a konta ku sosten di vários partner den industria manera Curaçao Marriott Beach Resort & Emerald Casino, Hilton Curaçao, Renaissance Curaçao Resort & Casino, Santa Barbara Beach & Golf Resort Curaçao i Sunscape Curaçao Resort, Spa & Casino.

CTB ta sigui enfoká su esfuersonan di merkadeo pa oumentá e kantidat di turista for di Estado Unídos.