CTB ta lansa 2 billboard komo promoshon pa Carifta Games 2017

WILLEMSTAD- 10 di febrüari 2017 – Resientemente Ofisina di Turismo di Kòrsou (CTB) komo partner di Carifta Games 2017 a lansa dos billboard pa promové e evento deportivo grandi aki. Un billboard ta ubiká enfrente di Goisco Wholesale Club i e di dos ta e billboard digital ubiká na Jan Noorduynweg #1. Carifta Games ta tuma lugá di 15 pa 17 di aprel 2017 aki na Kòrsou. Esaki lo bira e di 46 edishon di e evento deportivo regional aki. E evento ta trese e atletanan di mas mihó i talentoso di e diferente paisnan den aria di Karibe. Ta spera riba un total di mas òf ménos 600 atleta internashonal ku lo keda kompañá pa nan coachnan i algun ta bini tambe ku nan famia. Mirando e kantidat grandi di bishitante ku e evento aki ta trese pa Kòrsou, CTB sigur ta duna su sosten na e evento deportivo aki. CTB ta hasi uso di e oportunidat pa invitá pueblo di Kòrsou pa kòrda bai wak e diferente kompetensianan i asina sostené nos atletanan lokal ku lo tuma parti na Carifta Games 2017.