CTB ta lansa kampaña promoshonal: Kòrsou su tesoronan skondí

Willemstad- 7 di òktober 2014: Ofisina di Turismo di Kòrsou (CTB) su kantor na Hulanda a lansa un kampaña promoshonal nobo pa hala atenshon riba Kòrsou su tesoronan skondí. Lema di e kampaña ta: ‘Ekspandé bo horizonte’.E kampaña ta konsentrá su mes riba laga e futuro bishitante sa ku Kòrsou ta mas ku solamente solo, santu i laman. Kòrsou tin hopi mas di ofresé. E kampaña ta keda kondusí via medionan sosial, blogs popular i tambe wèpsait.

Un kampaña manera esaki ta hopi importante mirando ku no ta tur futuro bishitante ta konsiente di e echo ku Kòrsou tin un produkto hopi diversifiká. Komo parti di e kampaña lo para ketu na e historia di Kòrsou, e kolonan briante di laman Karibe, nos hendenan, músika i e kuminda típiko di Kòrsou. Di un forma aktivo lo trata pa medio di e kampaña pa alkansá e grupo di enfoke pa bishita nos isla. E wèpsait nobo di Kòrsou ku resientemente CTB a lansa esta www.curacao.comlo ta parti sentral di e kampaña. Tur informashon ku sali di e kampaña lo ta di link ku e wèpsait nobo. E wèpsait ta duna un bista di paisahenan bunita di Kòrsou i tambe informashon ku ta di relevansia pa e futuro bishitante.

Meta final di e kampaña ‘Ekspandé bo horizonte’ ta, pa logra ku e futuro bishitante ta keda inspirá pa bishita nos pais dor ku e la siña konosé mas di e produkto ku Kòrsou ta ofresé. E kampaña ta dirigí primeramente riba profeshonalnan yòn i esnan di edat un tiki mas avansá. Banda di e informashon ku lo keda kompartí via retnan sosial lo manda informashon dirigí pa agentenan di biahe den forma di un korant informativo. E kampaña ‘Ekspandé bo horizonte’ ta kore di 7 di òktober pa desèmber 2014 i lo keda ehekutá den koperashon ku M2Media.