CTB ta lansa ‘Tourism Insight active report’

WILLEMSTAD- 4 di mart 2016 – Resientemente Ofisina di Turismo di Kòrsou (CTB) a lansa un hèrmènt online nobo, ‘Tourism Insight active report’. E sistema aki ta proveé datonan importante i estadístika riba turismo di Kòrsou. E meta di e sistema aki ta pa por asistí stakeholders i públiko en general pa por tuma desishonnan sosio-ekonómiko miéntras ta kontinuá ku e esfuersonan pa desaroyá e marka Kòrsou. E datonan ta keda kompilá for di e karchinan di embarkashon i desembarkashon. E kontenido lo keda aktualisá riba un base mensual.

E ‘Tourism Insight active report’ ta repartí den tres sekshon: resúmen (overview), un análisis regional (regional analysis) i otro dimenshonnan (other dimensions). E sekshon di resúmen ta proveé informashon di e kantidat di turista di estadia repartí bou di e 10 merkadonan prinsipal. E sekshon aki ta duna e posibilidat pa wak bèk den e sifranan di turismo di estadia, kantidat di anochi ku e bishitantenan a keda nos pais i turismo krusero. E datonan aki ta for di aña 2000 te ku e aña aki. Den e sekshon ku ta duna un análisis regional por haña e prestashon regional ku mapa di kada pais. E di tres sekshon ta enfoká riba e dimenshonnan mas importante di e 10 merkadonan prinsipal ilustrando e tipo di akomodashon, durashon di estadia i e grupo di edat.

Pa haña akseso na e ‘Tourism Insight active report’ bai riba http://bit.ly/1TwczkH

For di un kòmpiuter e sistema ta kompatibel ku Internet Explorer 8.0, 9.0, 10 i 11. Usuarionan di Apple mester download “IBM Cognos Mobile application” riba nan tablet i/òf smart phone pa por wak e rapòrt. Hasiendo esaki bo tin estadístikanan di turismo semper aksesibel unda ku bo ta.