CTO a organisá su programa di Hospitality Assured na Kòrsou

...8 persona di Kòrsou a keda sertifiká...
WILLEMSTAD – 27 di yüni 2017 – Resientemente komo parti di e partnership kontinuo ku Caribbean Tourism Organization (CTO); Union Europeo bou di su programa pa empresanan mediano i chikí yamá COSME a organisá na Kòrsou e Hospitality Assured Advisor Training Workshop. Hospitality Assured ta un sertifikashon internashonalmente rekonosé kual CTO a apliká pa uso den Karibe komo e stèndert pa servisio i ekselensia den empresanan. Na e workshop aki a partisipá representantenan di: Ofisina di Turismo di Kòrsou (CTB), Curaçao Innovation & Technology Institute (CITI) i Creating Milestones.

E programa di Hospitality Assured su meta ta pa promové un kultura di kalidat, servisio ekselente i mehorashon kontinuo hasiendo uso di un hèrmènt ku ta rekonosé internashonalmente komo un manera pa duna sosten na e aspekto di servisio na kliente den empresanan turístiko. E promé tarea di e programa ta pa train algun persona komo business advisors i ekipá nan ku e konosementu, abilidatnan i aktitut nesesario pa por traha efisientemente ku organisashonnan i guia nan dor di e programa di Hospitality Assured pa asina logra ekselensia.

E workshop a keda guiá pa e fasilitadonan, Norma Shorey-Bryan i Sharon Banfield-Bovell. Hasiendo uso di un aserkamentu interaktivo durante di e workshop a yuda pa enkurashá e partisipantenan pa kompartí nan eksperensianan, perspektivanan i preokupashonnan i pa siña for di otro. E presentashonnan a stimulá diskushon den grupo kual a yuda pa e partisipantenan para ketu na kon pa apliká e konseptonan den organisashonnan na Kòrsou. E seshonnan a inkluí entre otro: Kiko ta ekselensia, Vishon i balornan, Planifikashon di prosesonan empresarial i Kompartí práktikanan ku a duna resultado positivo.

E personanan ku a terminá e workshop ku éksito ta: Dr. Dino Daal (CTB), Faisol Ayoubi (CTB), Raquel Trenidad (CTB), Deidre Polonius (CTB), Suhailly Clementina-Hooi (CITI), Anralies Hooi (CITI), Raquel Weisz (Creating Milestones) i Chiquita Groenewoud-Kotzebue (MEO) ku a kompletá e programa na 2016. Pues awor por bisa ku Kòrsou tin 8 persona ku ta kla pa por bai guia implementashon di e modelo di Hospitality Assured den empresanan chikí, mediano i grandi den e industria di turismo i hospitalidat.