‘Curaçao Boomerang’ a motivá e bishitante hulandes pa kompartí su eksperensia positivo di Kòrsou

WILLEMSTAD – 12 di yüni 2017 – Resientemente Ofisina di Turismo di Kòrsou (CTB) a lansa na Hulanda un kampaña pa enkurashá públiko hulandes pa kompartí nan eksperensia inolvidabel di Kòrsou, ku chèns di gana un biahe pa 2 persona pa nan isla faborito, Kòrsou! E idea tras di e kampaña riba ret sosial tabata pa akumulá mas tantu eksperensia posibel di e bishitante hulandes i asina demostrá e diversidat di Kòrsou. ‘Curaçao Boomerang’ ta forma parti di CTB su kampaña prinsipal #RightNowInCuracao.

Komo parti di e kampaña a repartí na diferente café, bar i restorant na Hulanda karchinan ku riba dje e teksto “Vertel me alles, dushi” (konta mi tur kos, dushi). E kampaña a keda promové riba e página di Facebook di Kòrsou i bou di e 25.000 konsumidónan ku ta suskribí pa risibí e boletin mensual di CTB kual ta kontené novedat turístiko i kampañanan spesial di Kòrsou. A invitá e hulandes pa kompartí su eksperensia den forma di un historia kòrtiku riba CTB su website na curacao.com/boomerang. E mihó 10 historianan a keda anunsiá dia 7 di yüni riba curacao.com/boomerang. E historia ku risibí mas tantu ‘likes’ lo ta e felis ganador. E ganador lo keda anunsiá dia 15 di yüni próksimo.

E bishitante hulandes stima Kòrsou. Hopi ta esnan ku ta bai bèk Hulanda ku eksperensianan masha bunita i ta konta nan sirkulo di amistat kon nos dushi isla a hòrta nan kurason pa semper. Esaki ta e efektoku CTB tabata deseá di kompartí ku e kampaña aki. Kada bishitante ku kompartí nan eksperensia úniko di Kòrsou ta lanta kuriosidat serka un otro ku sigur tambe lo kier bishita Kòrsou pa por sera konosí di aserka ku nos historia, kultura i dushi hendenan.