Curaçao North Sea Jazz ta sigui influensiá nos ekonomia positivamente

...Turismo a generá 68 mion florin den luna di sèptèmber 2015...
WILLEMSTAD- 27 di òktober 2015 – E festival di Curaçao North Sea Jazz (CNSJ) ta sigui kontribuí na kresementu di nos turismo. Pa luna di sèptèmber Ofisina di Turismo di Kòrsou (CTB) ta raportá un kontribushon direkto di 68 mion florin pa nos ekonomia. Esaki ta un kresementu di 7% kompará ku aña pasa kaminda un total di 63 mion florin a keda registrá.

E kantidat di turista di estadia pa luna di sèptèmber ta mustra un subida di 6%. Sifranan preliminar kolektá pa CTB ta indiká ku pa luna di sèptèmber a registrá un total di 39.907 turista di estadia. Na luna di sèptèmber aña pasá e kantidat di turista tabata 37.762.

Kantidat di bishitante for di eksterior pa Curaçao North Sea Jazz Festival
Gran mayoria di e bishitantenan for di eksterior ku a bishitá e festival a yega Kòrsou entre djarason 2 di sèptèmber i djabièrnè 4 di sèptèmber. Aña pasá e evento aki a tuma lugá den luna di ougùstùs. E kambio den fecha di e festival ta keda reflehá den e sifranan positivo pa turismo di estadia. Aunke ku por mira un bahada for di Venezuela, tòg por konstatá ku e evento di CNSJ a pèrkurá pa un subida den kantidat di bishitante den luna di sèptèmber. Dor di e efekto di un evento internashonal di e magnitut aki, CTB lo bai enfoká riba atraé eventonan internashonal den e periodonan ku nos isla tin e potensial pa krese suptantialmente.

Tráfiko debí na CNSJ a oumentá prinsipalmente for di Aruba, Colombia i Sürnam. E paisnan menshoná semper a demostrá nan interes pa e festival i e aña aki no tabata un eksepshon. Un análisis hasí durante di e 3 dianan promé ku e festival ta mustra un oumento di 273% mas bishitante for di Aruba kompará ku e mesun periodo aña pasa kaminda no tabatin niun evento tumando lugá. Dor di e festival a registrá 400 bishitante mas for di Aruba. E mesun fechanan aki ta mustra kresementu di 190% for di Colombia i 114% for di Sürnam.

E seis paisnan ku a registrá e mihó kresementu den kantidat di bishitante for di eksterior durante di e fechanan rondó di CNSJ ta keda ilustrá den e siguiente tabèl:

Turismo di estadia

2, 3 i 4 di sèptèmber 2015

2, 3 i 4 di sèptèmber 2014

% Kambio

Aruba

563

151

273%

Colombia

296

102

190%

Sürnam

509

238

114%

Estado Unídos

596

295

102%

Venezuela

1,107

836

32%

Hulanda

1,148

952

21%

Resúmen

4,219

2,574

64%

E informashon aki ta saká for di e karchinan di embarkashon i desembarkashon di CTB/Imigrashon

Turismo di estadia for di e diferente regionnan:
Merkado di Europa a registrá 3% mas turista na luna di sèptèmber. For di e region aki nos a risibí 15.205 turista di estadia kompará ku 14.762 na sèptèmber 2014. For di Hulanda, e pais for di kua nos ta risibí mas tantu turista a registrá un oumento di 6% kompará ku 2014.

E region Norteamerikano na luna di sèptèmber a konosé un kresementu di 29.65% ku un total di 5.182 turista, esaki tabata 3.997 aña pasá. Un kresementu di 21% a keda registrá for di Estado Unídos kual ta representá 4.547 turista di estadia. E esfuersonan di merkadeo hasí dor di sektor públiko i privá lo sigui pèrkurá pa resultadonan positivo for di e merkado di Estado Unídos. CTB ta komprometé na alkansá kresementu sólido durante di henter aña for di e merkado aki, ku lo por kondusí na e kantidat di buelonan ku a keda pronostiká. E buelonan di Air Canada henter aña for di Toronto ta sobresalí registrando oumento di 150% den kantidat di turista for di Canada. Un total di 635 kanades a bishita nos pais durante luna di sèptèmber.

Region di Sur Amérika a registrá un bahada di 3.22% na sèptèmber 2015. Un total di 14.325 turista a bishita nos pais kompará ku 14.801 na 2014. Venezuela a registrá un bahada di 9% den luna di sèptèmber 2015. Dor di monitor e situashon na Venezuela durante di e último lunanan CTB ya a premirá e bahada for di e merkado aki pa kual motibu a kuminsá hinka e esfuersonan di merkadeo dene merkado di Colombia. Tráfiko for di Colombia a subi ku 26% den sèptèmber komo resultado di e eliminashon di visa.

Sifranan i impakto ekonómiko promé 9 lunanan di 2015
Pa loke ta e promé nuebe lunanan di 2015 turismo di estadia a krese ku 4% di 325.167 pa 337.594. Un total di 12.427 turista adishonal a bishita nos pais registrando kresementu for di Nort Amérika i Europa. E regionnan a registrá kresementu di respektivamente 21% i 4%. Merkadonan di Sur Amérika i Karibe a registrá un kresementu neutral di 0% durante di e promé 9 lunanan di aña. E repartishon den merkadonan prinsipal ta, Nort Amérika 17.6%, Sur Amérika 28.1%, Karibe 7.5%, Europa 42.5% i otronan 4.3%.

Hasiendo uso di e modelo ‘Turistika’, CTB huntu ku MEO a kalkulá ku durante e promé nuebe lunanan di 2015, sektor di turismo a generá un impakto direkto di 588 mion florin pa nos ekonomia lokal. E montante aki ta representá un oumento kompará ku aña pasá kaminda un total di 550 mion florin a keda generá. Bishitantenan europeo ta responsabel pa 45.8% di e total. Tur huntu turistanan europeo a gasta 270 mion florin, siguí pa e turistanan for di e merkado di Sur Amérika ku 150 mion florin i esnan for di Nort Amérika ku 118 mion florin. Entradanan generá for di Karibe ta estimá na 33 mion florin.

Manera menshoná, e modelo ‘Turistika’ ta mustra ku sektor di turismo a generá un impakto direkto di yanüari pa sèptèmber 2015 di 588 mion florin. E turista ta gasta su sèn primordialmente na akomodashon (36.3%), kuminda i bebida (24.1%), kompra (22.7%), transporte (9.3%) i impuestonan direkto (7.6%).

Download e sifranan .