Curaçao Tourist Board Europa (CTBE) a sobresalí ku su partisipashon na 50PlusBeurs- Utrecht

WILLEMSTAD- 6 di òktober 2014: Resientemente a tuma lugá e feria di biahe anual 50PlusBeurs na Hulanda. Ofisina di Turismo di Kòrsou(CTB) ubiká na Europa (CTBE) a partisipá na e feria ku a tuma lugá entre 16 pa 20 di sèptèmber último na Utrecht. 50PlusBeurs manera ta e kustumber ta atraé un kantidat grandi di bishitante riba 50 aña ku ta bini huntu pa haña informashon di destinashonnan turístiko, risibí ofertanan spesial i alabes haña un ñapa di kada destinashon.

CTBE huntu ku vários partner den nos industria turístiko manera ACOYA Hotel Suites & Villas, Avila Beach Hotel, Lions Dive & Beach Resort, Livingstone Jan Thiel Resort, Dolphin Suites Curaçao, Pelican Express, Plaza Hotel i Blue Bay Curaçao Golf & Beach Resort a sobresali na e feria ku un ‘booth’ masha yamativo. Tur ku a bishitá 50PlusBeurs a keda altamente impreshoná ku e ‘Curaçao Experience’ den e stènt di Kòrsou. E eksperensia a konsistí di un stul relahante den kual e bishitante ta sinta i disfrutá di zonidonan tropikal kombiná ku historia di Kòrsou via di un headphone. E kombinashon di zonido i historia a hiba e bishitante su imaginashon Kòrsou, sin e buelo largu. Ademas di esaki a brinda un i tur ku a forma parti di e ‘Curaçao Experience’ un oportunidat di gana un biahe di 9 dia pa Kòrsou via di un kampaña di FaceBook riba e página di Kòrsou. Durante e biahe, e ganador lo keda den ACOYA Hotel Suites & Villas i disfrutá di tur loke Kòrsou tin pa ofresé komo destinashon turístiko.

CTBE por mira bèk riba un partisipashon eksitoso di Kòrsou na e feria di biahe 50PlusBeurs ku e aña aki a konta ku un total di 96.712 bishitante. Ta esensial pa durante ferianan di biahe, di e magnitut manera 50PlusBeurs pa impreshoná e bishitante i den un tempu kòrtiku presentá e mihó ‘kara’ di Kòrsou komo destinashon.