E turista for di Sürnam ta preferá Kòrsou

WILLEMSTAD- 29 sèptèmber 2015– Resientemente Ofisina di Turismo di Kòrsou (CTB) a bishitá Sürnam pa asistí na un enkuentro ku prensa i tambe duna un presentashon na agentenan di biahe. Sr. Hugo Clarinda, direktor interino di CTB i sra. Janine de Windt enkargá ku merkadeo pa e aria di Karibe a pèrkurá pa dos seshon informativo ku a resultá masha eksitoso.

Tópikonan ku a keda tratá durante e enkuentro ku prensa tabata entre otro: kresementu di e kantidat di bishitantenan for di Sürnam, impakto ekonómiko, kon e bishitante for di Sürnam ta hasi su reservashon pa bini Kòrsou i eskoho di akomodashon. Pa kompletá e seshon informativo a duna un komparashon den kresementu di bishitante entre añanan 2005 pa 2015. Finalmente a konkluí e bishita na Sürnam ku un presentashon na agentenan di biahe. Meta di esaki tabata pa oumentá e konosementu di e agente di biahe riba e produkto turístiko ku Kòrsou ta ofresé.E tema ‘The more you know the better you perform’ (‘Mas bo sá, mihó bo presta’) a keda bon risibí dor di tur partisipante. E presentashon a sirbi komo introdukshon na tur agente nobo i sigur komo rekordatoriopa tur agente di biahe ku tin hopi aña kaba ta bende Kòrsou komo destinashon turístiko. Durante di e presentashon na agentenan di biahe a konkluí ku Kòrsou ta ketu bai e destinashon #1 den Karibe pa e turista for di Sürnam.