Ekonomia Kompartí ta habri oportunidat pa organisashonnan lokal

...introdushon di e konsepto biahe basá riba eksperensia...
WILLEMSTAD- 21 di novèmber 2016 – Resientemente Ofisina di Turismo di Kòrsou (CTB) a organisá un presentashon públiko riba e tópiko:Turismo dirigí riba e eksperensia di e turista den e era di EkonomiaKompartí. E idea tras di e inisiativa aki ta pa yuda tantu personanan komo organisashonnan ku ta aktivo den e industria di turismo pa por komprondé e konseptonan nobo aki mihó, rekonosé e retonan i oportunidatnan ku e konseptonan aki ta krea. Biahe basá riba eksperensia i Ekonomia Kompartí tur dos ta tópikonan di aktualidat den e sektor di biahe i turismo awendia. E kresementu rápido di kompanianan manera Airbnb i Uber ta keda konstantemente raportá dor di ekspertonan di turismo i prensa internashonal.

Durante di e presentashon públiko e partisipantenan a haña un mihó komprondementu di entre otro: e relashon entre e konsepto Ekonomia Kompartí i kon pa enkurashá biahe basá riba eksperensia, kon pa atraé turistanan hasiendo uso di eksperensianan lokal nobo, e kriteria primordial ku un destinashon mester kumpli kuné pa por ta eksitoso riba e tereno di biahe ku énfasis riba eksperensia, desaroyo di produkto i merkadeo i ehèmpelnan di kompanianan den sektor di turismo ku ya kaba ta respondé na e oportunidatnan ku Ekonomia Kompartí ta brinda. Banda di e presentashon públiko a organisá tambe un workshop di 3 dia kaminda e énfasis tabata dirigí riba oportunidatnan ku Ekonomia Kompartí ta ofresé pa Kòrsou i tambe e oportunidatnan nobo den e mundu di eksperensia di biahe riba nivel lokal. E resultado di e workshop aki tabata ku 5 atrakshon a palabrá ku nan lo kontinuá pa krea nan eksperensia outéntiko propio pa asina por brinda esaki na futuro bishitantenan i krea un eksperensia memorabel di e produkto. CTB lo duna sosten na e 5 atrakshonnan aki.

Tantu e presentashon públiko komo e workshop a keda guia pa sra. Judy Karwacki di Small Planet Consulting. Sra. Karwacki ta un eksperto riba tereno di turismo i biahe ku mas di 30 aña di eksperensia riba tereno di retail travel, edukashon, maneho i konsulta. E tin eksperensia ekstenso den region di Latino Amérika i Karibe kaminda e la traha ku mas di 20 destinashon i pa mas ku 25 aña.