Firmamentu akuerdo di intenshon entre CTB i Latin Interactive Group

...Pa yega na un ‘booking engine’ pa hotèlnan i apartamentunan...
WILLEMSTAD- 31 di mart 2017 – Resientemente a tuma lugá firmamentu di un akuerdo di intenshon (Letter of Intent – LOI) entre Ofisina di Turismo di Kòrsou (CTB) i Latin Interactive Group ku ta e representante ofisial di SABRE den aria di Karibe. SABRE ta un sistema di distribushon global ku ta kontené entre otro informashon di aerolíneanan, hotèlnan, liñanan krusero i kompania di hür outo. Ta trata aki di un sistema ku ta keda usá pa agentenan di biahe rònt mundu. SABRE ta brinda oportunidat na e usuarionan di e sistema pa por buska e mihó preis i hasi reservashon di ticket. E akuerdo ta enserá ku lo eksplorá e posibilidat pa instalá un asina yama booking engine riba e website di CTB. E booking engine aki ta duna oportunidat na hotèlnan, apartamentunan i tambe otro kompanianan ku tin relashon ku turismo pa por bende nan kambernan i produktonan online. Minister di Desaroyo Ekonómiko, sr. Errol Goeloe tambe tabata presente durante di firmamentu di e LOI.