Fly Allways for di Sürnam a inougurá buelo pa Kòrsou

WILLEMSTAD- 25 di yüni 2017 – Entrante 25 di yüni, Fly Allways a kuminsá ku buelo 2 biaha pa siman riba djadumingu i djárason entre Sürnam i Kòrsou. Na yegada di e promé buelo a hiba palabra Minister di Desaroyo Ekonómiko, Dr. Steven Martina, Chief Commercial Officer di Fly Allways, sr. Masood Kazmi, Chief Commercial Officer di Curaçao Airport Partners, sra. Peggy Croes i CEO di CHATA, sr. Miles Mercera. Minister Martina aekspresá su satisfakshon pa ku e buelo inougural di Fly Allways.

Riba e buelo inougural e crew di Fly Allways a keda kompañá pa diferente medio di komunikashon for di Sürnam ku a bini pa kubri e promé buelo pa Kòrsou. E buelo lo ser efektuá ku un Fokker 70 kual tin un kapasidat di 80 stul. Kòrsou a demostrá di ta un destinashon ideal pa vakashon pa turistanan for di Sürnam. E buelonan di Fly Allways sigur lo yuda pa asina trese mas tantu bishitante pa nos pais.

CTB, CAP i CHATA ta deseá Fly Allways tur kos bon ku e buelonan pa Kòrsou.