Full Moon & Lighting Parade pa lokal i turista

...Selebrashon Dia Mundial di Turismo...
WILLEMSTAD- 17 di sèptèmber 2015 –Den kuadro di selebrashon di Dia Mundial di Turismo Ofisina di Turismo di Kòrsou (CTB) ta organisá un parada bou di e nòmber Full Moon & Lighting Parade. E parada ta tuma lugá djasabra 26 di sèptèmber saliendo for di Sambil i terminando na Brionplein.

Dia Mundial di Turismo ta keda selebrá anualmente riba dia 27 di sèptèmber i ta hiba di tópiko e aña aki; ‘1 bion turista, 1 bion di oportunidat’. Turismo ta e pilar ekonómiko number unu. Mas turista ta nifiká mas desaroyo pa nos pais. Saliendo for di e tópiko aki, CTB ta organisá un parada pa tantu nos hendenan lokal komo e turista. Durante di e parada ta e intenshon pa e turista por interakta ku nos hendenan lokal i pa di e manera ei eksperensiá un parti di nos kultura.

E parada ta sali for di Sambil pa 7or di anochi subiendo Helmin Wiels Blvd -Veerisweg - Weg naar Westpunt - Schottegatweg West - Weg naar Welgelegen – Rodeweg - Breedestraat (O) i ta terminá na Brionplein. Animashon musikal ta den man di dj RO-1 i Universal Brassband. Na final di e parada lo tin ambiente riba Brionplein i lo sera e selebrashon ku un show di vürwèrk pa 12:00 di anochi.

Benta di T-shirt ta tuma lugá na CTB di djaluna pa djabièrnè di 8or di mainta pa 5or di atardi i tambe riba djasabra 19 di sèptèmber di 9or di mainta pa 1or di mèrdia. Huntu ku e T-shirt lo risibí tambe un artíkulo di lus pa usa durante e parada. Partisipá bo tambe i selebrá Dia Mundial di Turismo huntu ku nos turistanan.