Gana premio riba Instagram ku kampaña di konsientisashon Dushi Hende t’ Ami; Mi ta ON!

...Turismo den bo bista...
WILLEMSTAD- 29 yüli 2016 – E kampaña di konsientisashon di Ofisina di Turismo di Kòrsou (CTB) dirigí spesialmente riba hóbennan entre 12 i 19 aña, Dushi Hende t’ Ami; Mi ta ON! ta konsistí di diferente proyekto, tur ku e meta pa krea mas konsiensia serka hóbennan riba e importansia di desaroyo di turismo. Komo parti di e kampaña a lansa un kompetensia di potrèt ku ta keda kondusí riba Instagram.

E hóben por partisipá individual òf den grupo sakando un potrèt ku ta deskribí for di su òf nan punto di bista kiko ta turismo. E premionan ta masha atraktivo; promé premio: Go Pro Hero 4 Silver, segundo premio: ATV Buggy Rides i tercer premio: un trip riba Flyboard.

Partisipashon ta fásil; mester pone e potrèt riba Instagram huntu ku un deskripshon di maksimal 30 palabra, usando e hashtag #mitaon. Si e potrèt ta saká den grupo ta importante pa ‘tag’ tur esnan ku ta riba e potrèt inkluyendo @dushi_hende. Ora ku e potrèt keda aprobá konforme e kriterionan di e kampaña, lo ‘post’ esaki riba e perfil di @dushi_hende pa otro hende tambe por ‘like’. A ekstendé e kampaña te ku dia 26 di ougùstùs 2016, 12or di mèrdia. Dia 5 di sèptèmber 2016 CTB lo saka e ganadornan. Despues lo anunsiá e ganadornan ofisialmente via e plataformanan digital di Dushi Hende. Pa e reglanan di kampaña por subi e página di Instagram: @dushi_hende òf www.facebook.com/DushiHende.

E kampaña di konsientisashon aki ta finansiá pa Reda Sosial, ku fondo di Gobièrnu di Kòrsou. CTB tambe ta kontribuí finansieramente den e proyekto aki i huntu ku Fundashon Nos Kousa ta enkargá ku ehekushon di e proyekto.