Grupo di prensa for di Bèlgika a sera konosí ku Kòrsou

...Ta trata aki di e 3 korantnan mas grandi na Bèlgika...
WILLEMSTAD- 4 di yüni 2015– Ofisina di Turismo di Kòrsou (CTB) konstantemente ta risibí bishita di prensa internashonal riba nos isla. Resientemente CTB a diseñá un programa spesífikamente pa un grupo di periodista for di Bèlgika. Meta di e programa aki tabata pa laga nan sera konosí ku Kòrsou di un manera mas aktivo i ekshibí tur loke Kòrsou tin pa ofresé komo destinashon turístiko.

E grupo a konsistí di 4 miembro di prensa kualnan ta: Lore Callens editor di Libelle, Wim Conings editor di Het Nieuwsblad / De Gazet van Antwerpen / Het Belang Van Limburg, Jo Fransen editor di Weekend Knack i Peter van Hecke editor di Accent Magazine. Libelle ta un revista semanal dirigí riba hende muhé entre 25 i 44 aña, ku un produkshon total di 270.267 kopia ku ta yega na un total di 918.500 lesadó. Miéntras, Het Nieuwsblad / De Gazet van Antwerpen / Het Belang Van Limburg huntu tin un sirkulashon di 537.783 i ta yega na mas ku 1.500.000 lesadó. Ta trata aki di e 3 korantnan mas grandi na Bèlgika. Weekend Knack ta un revista semanal dirigí riba hende hòmber i hende muhé moderno, ambisioso i independiente ku ta produsí un total di 137.786 kopia. E revista Accent Magazine ta keda distribuí den e área turístiko di kosta di Bèlgika ku un produkshon di 50.000 kopia kual ta keda produsí dos biaha pa aña. CTB a hinka un iterinario atraktivo den otro konsistiendo di 5 dia yená ku aktividatnan turístiko ku a inkluí entre otro paseo den sentro di suidat, almuerso den Plasa Bieu, un tour ku kayak den Spaanse Water, paseo den naturalesa, enkuentro ku dòlfein, un rekorido ku buggy i un bishita na Curaçao Winery. Ademas di esaki a duna nan un eksperensia kulinario tambe ku a varia entre almuerso i sena na diferente restorant. E grupo a hospedá durante di nan bishita na Papagayo Beach Hotel.

CTB ta gradisí tur partner pa nan kontribushon na realisashon di e programa.