Hopi ekspektativa na hermana isla Aruba pa Curaçao Extreme Drag Fest 2017

WILLEMSTAD 2 di aprel 2017:- Ofisina di Turismo di Kòrsou (CTB) un biaha mas ta promové karedanan di ‘drag race’ den eksterior, den e kaso aki ta trata di Curaçao Extreme Drag Fest 2017. Eventonan manera ‘drag race’ ta un oportunidat pa promové nos isla i atraé fanátikonan di e deporte di velosidat na Kòrsou.

CTB huntu ku e tim di Curaçao Extreme Foundation (CEF) ta trahando huntu pa promové e evento di Curaçao Extreme Drag Fest 2017 den eksterior ku énfasis riba nos hermana isla Aruba. Aruba su asistensia durante e eventonan di ‘drag race’ semper ta na gran eskala, p’esei mes e tim di Kòrsou tabata na Aruba pa un ‘media tour’ pa asina duna tur informashon di e karedanan i di tur e posibilidat di entretenementu ku Kòrsou tin di ofresé durante e fin di siman di Curaçao Extreme Drag Fest 2017.

Komunidat di Kòrsou ta keda invitá pa bishita Curaçao Extreme Drag Fest 2017 i apoyá nos koredornan lokal pero tambe nos bishitantenan for di Aruba, Bonaire, Colombia, Panama, Puerto Rico i Venezuela. Dianan 29 i 30 di aprel i promé di mei 2017 lo tin hopi ‘speed’ na Curaçao International Raceway durante Curaçao Extreme Drag Fest 2017. Pa mas informashon bishitá: www.curacao-extreme.com / i www.facebook.com/CuracaoExtremeFoundation/