JetBlue ta hasi entrega di 500 buki na 3 skol na Kòrsou

WILLEMSTAD- 5 desèmber 2014:- Manera ta konosí djamars último 2 di desèmber e kompania di aviashon JetBlue Airways a lansa dos bes pa siman buelo direkto entre New York i Kòrsou. Awor JetBlue ta ofresé 121 buelo diario for di Estádos Unídos pa Karibe di kual 56 buelo diario ta buelonan direkto for di New York, John F. Kennedy International Airport (JFK) i Newark Liberty International Airport (EWR). Ta un kustumber di e aerolínea pa komo parti di nan responsabilidat sosial empresarial duna bek na komunidat. Pa ehersé e trabou bunita aki, JetBlue ta traha ku su partner First Book. Den e kaso aki a skohe pa hasi esaki na tres skol aki na Kòrsou. Pa e okashon aki sr. Anders Lindström, Relashonista Públiko di JetBlue tabata presente pa asina hasi entrega di e 500 bukinan na Blenchi School, Oranjeschool i Emmy Berthold School.

First Book ta un empresa sosial ku no ta generá entrada ku ta brinda buki i rekursonan edukashonal na programanan i skolnan sirbiendo muchanan ku ta bini di famianan di ménos rekurso na Estádos Unídos i Canada. Dor di tin bukinan nobo i di kalidat haltu disponibel riba un base regular, First Book ta transformando bida di muchanan i elevá e kalidat di edukashon.

“ Nos ta kontentu ku huntu ku nos partner First Book nos por a ofresé buki na 3 skol aki na Kòrsou ku tin mas mester di dje kualnan ta Blenchi School, Oranjeschool i Emmy Berthold School. Huntu nos di JetBlue i First Book a duna te ku aworakí mas ku 350 mil buki na muchanan di ménos rekurso òf ku nesesidat spesial. Yuda mehorá lesamentu den komunidat ta importante pa JetBlue. Nos ta kontentu ku nos por a entrega tambe algun buki na Curaçao Cares pa nan programa di lesamentu bou di guia,” asina sr. Anders Lindström di JetBlue a duna di konosé.

“ Nos di Curaçao Cares ta kontentu ku nos por a fasilitá e entrega di e bukinan aki na Kòrsou. Lesamentu ta habri un mundu nobo pa kada mucha asina sra. Deva-Dee Siliee di Curaçao Cares a indiká. Nos tin tambe un programa piloto di coach di lesamentu ku nos a lansa na skolnan i programanan despues di skol kual nos ke sigui ekspandé ku sosten di boluntarionan”.

E entrega di e bukinan a tuma lugá na Blenchi School. Sr. Anders Lindström di JetBlue a hasi entrega di e 500 bukinan repartí bou di Blenchi School, Oranjeschool i Emmy Berthold School. Na e okashon aki representante di kada un di e skolnan a hiba palabra ekspresando nan gratitut pa e materialnan risibí. E muchanan lo bai hasi bon uso di esakinan.