Juliana Alves; e kara di Kòrsou na Brazil

WILLEMSTAD- 21 di febrüari 2016– Loke mas e aktris Juliana Alves, e kara di Kòrsou, na Brazil ta gusta di nos isla ta e diversidat den union ku bo ta eksperensiá na Kòrsou. E aña aki su presensia komo anfitrion den e camarote (un espasio spesial pa invitadonan) di Kòrsou durante di e karnaval di Rio de Janeiro a hala hopi atenshon. Juliana Alves, e aña aki a sali na di dos lugá den e kompetensia di ‘Reina di Bateria’. ‘Reina di Bateria’ ta algu komparabel ku nos reina di karnaval pero ku ta konta tambe ku partisipashon di e banda di samba, alrededor di 200 persona kual ta forma parti den e totalidat di e presentashon di e reina. Juliana ta sintié kómodo i enkantá di por ta e kara di Kòrsou na Brazil.

Ofisina di Turismo di Kòrsou (CTB) resientemente a firma un akuerdo ku Juliana Alves pa ta kara di Kòrsou na Brazil. Esaki a resultá oportuno den e periodo di karnaval ora ku Juliana Alves, a sali number dos den e kompetensia di ‘Reina di Bateria’, den representashon di su skol di samba ‘Unidos da Tijuca’. ‘Unidos da Tijuca’ ta e di tres skol mas bieu aktivo na Brazil i a keda funda na 1931. Ta trata aki di un skol ku kada aña ta desfilá ku alrededor di 4000 mil partisipante den e karnaval di Rio de Janeiro.

Juliana Alves ta un artista konosí na Brazil. E tin 33 aña i a nanse na Rio de Janeiro, Brazil. Anteriormente el a aparesé den ‘Cheis de Charme’ (2012), ‘Two Faces’ (2007) i ‘India-A Love Story’ (2009.) Medionan na Brazil ta tipifik'é komo elegante, bunita i simpátiko. CTB ta hasiendo bon uso di e atenshon ku e ta atraé manera tabata e kaso durante di karnaval e aña aki na Rio de Janeiro. Su imágen ya ta keda usá pa CTB riba e diferente plataformanan online di CTB i pronto lo amplia esaki pa mas medionan.

Sr. Hugo Clarinda (CTB) a indiká ku Juliana Alves ta un persona ku e públiko di Brazil ta asosiá kuné. Su eskoho pa ta kara di Kòrsou ta brinda nos e oportunidat pa introdusí òf hasi Kòrsou mas konosí den e merkado di Brazil ku ta un merkado grandi i ku bon potensial pa Kòrsou desaroyá den dje komo destinashon turístiko. Manera Juliana mes ta bisa e diversidat den union, kombiná ku entre otro nos playanan i otro atrakshonnan ta atraktivo pa e brasileño.