Kampaña publisitario di CTB a gana SABRE Award

WILLEMSTAD- 20 di mei 2015 – Despues kue kampaña publisitario #MijnCuraçao a keda nominá resientemente pa SABRE Awards, a drenta e notisia ku Ofisina di Turismo di Kòrsou (CTB) na Europa a gana e prestigioso premio aki. E rekonosementu importante aki ta suprayá esfuersonan den relashon públiko. SABRE Awards, e kompetensia mas grandi den industria di publisidat ta rekonosé ekselensia den programanan publisitario. E kampaña #MijnCuraçao a risibí un aplouso grandi serka e krítikonan den e kategoria di bloggers outreach. E premiashon a tuma lugá dia 19 di mei último na Londen.

E strategia ku a keda usá den e kampaña aki ta ku a usa komo partner un asina yamá travel blogger pa e bira un tipo di reportero pa Kòrsou. E reportero aki tabata klave den e strategia no solamente paso e ta kompartí online su eksperensianan via medionan sosial pero tambe paso su programa di dia tabata konsistí di kompartí tep i publiká historianan ku e ta risibí via medionan sosial di personanan lokal i biaheronan. E kolaborashon ku Lisette van Beek (travel blogger) di Travellust.nl a bira yabi pa éksito di e kampaña. A drenta kasi 350 tep di aktividatnan riba tereno kultural, deportivo i te hasta playanan ku ainda no a keda deskubrí. Fanatikonan riba medionan sosial a hasta pone ‘must do’ pa esnan ku ainda no a eksperensiá Kòrsou, tur 100% positivo i ku hopi entusiasmo. Meta di esaki tabata pa inspirá i lanta kuriosidat di potensial bishitantenan pa asina nan skohe Kòrsou komo nan próksimo destinashon pa vakashon.