Kantidat grandi di prensa internashonal presente pa CNSJ 2014

WILLEMSTAD- 26 ougùstùs 2014:- Curaçao North Sea Jazz Festival sin duda ta e festival musikal di mas grandi den region karibense. E aña aki tambe e festival a konta ku promoshon riba diferente plataforma internashonal. Ofisina di Turismo di Kòrsou (CTB) den estrecho kolaborashon ku Fundashon Bon Intenshon a hasi uzo di tur hèrmènt di merkadeo pa asina sigurá ku tur kaminda e popular festival ta wòrdu promové. E aña aki riba invitashon di CTB un kantidat di 42 miembro di prensa internashonal di korant, radio, televishon, revista i media sosial lo tei presente.

E promoshon hasi den eksterior a konsistí di entre otro konferensha di prensa na Aruba, Sürnam i Panamá kaminda a duna informashon di e artistanan ku lo tei presente, benta di karchi i tambe e posibilidat pa kobertura di parti di periodistanan internashonal. A hasi promoshon na radio na Venezuela, St. Maarten, Aruba i Merka kaminda a rifa karchi pa asistí na e festival musikal grandi aki. E interes inmenso pa e festival serka miembronan di prensa regional ta notabel. Fuera di esnan den region, prensa for di Europa i Merka tambe a registrá. E aña aki ta konta ku prensa for di Bèlgika, Alemania, Brazil, Aruba, Sürnam, St. Maarten, Colombia, Panamá, Venezuela i Estádos Unídos. E lista di presensia di prensa internashonal ta inkluí Marie Clair Magazine (Bèlgika), Rolling Stone Magazine (Brazil), Apintie Television & Radio (Sürnam), One Caribbean Television & Website (Merka i Karibe), W Radio (Colombia), Los Originales RCN Radio (Colombia), korant El Carabobeño (Venezuela), korant El Informador (Venezuela) i kanal di televishon Destination Jazz (Merka).

For di awor CTB ta gradisí miembronan di prensa lokal i internashonal pa e interes demostrá den kobertura di e di 5 edishon di Curaçao North Sea Jazz Festival. Ku presensia di miembronan di prensa internashonal Kòrsou lo risibí un oportunidat di merkadeo mahestuoso ku sigur lo ta di benefisio pa nos isla. Un danki ta bai na ACOYA Hotel Suites & Villas ku a sòru pa e parti di akomodashon di diferente di e miembronan di prensa internashonal. Kòrsou bo ta kla pa Curaçao North Sea Jazz Festival 2014? Laga nos komo isla demostrá hospitalidat na tur bishitante i hasi nan estadia na Kòrsou inolvidabel.