Karedanan di Curaçao Extreme Finals 2016 lo ta grandi atrobe

...Aruba a haña invitashon personal durante ‘Media Tour’...
WILLEMSTAD 27 òktober 2016:- Aruba ta kla pa partisipá na e di dos edishon di Curaçao Extreme Finals 2016. Resientemente representante nan di Ofisina di Turismo di Kòrsou (CTB) i Curaçao Extreme Foundation (CEF) tabata na Aruba i a tene un ‘media tour’ pa asina informá tur interesado di e evento grandi aki ku lo tuma lugá 1,2 i 3 di dezèmber próksimo na Curaçao International Raceway.

E karedanan di ‘drag race’ di Curaçao Extreme Finals (CXF) a resultá un éksito aña pasa. Aruba tabatin un gran partisipashon na 2015, motibu pa kual CTB i CEF a uni atrobe durante un ‘media tour’, i asina bishita diferente radio i televishon i tene un reunion ku prensa, koredornan i fanátikonan di e deporte di velosidat pa informá i invitá Aruba den su totalidat pa bin Kòrsou durante e karedanan di CXF 2016 ku lo ta grandi ku partishon di diferente pais.

Dianan 1,2 i 3 di dezèmber próksimo Kòrsou lo ta anfitrion pa diferente pais manera entre otro; Aruba, Bonaire, Colombia, Merka, Hulanda, Puerto Rico, Venezuela i naturalmente Kòrsou mes. Pa mas informashon di Curaçao Extreme Finals bishita nan página di Facebook.