Kobertura internashonal pa e di 6 edishon di CNSJF

WILLEMSTAD- 8 sèptèmber 2015 :- Curaçao North Sea Jazz Festival (CNSJF) 2015 a superá tur espektativa. CNSJF a posishoná su mes un bia mas komo e evento musikal di mas grandi den region di Karibe. Manera e añanan anterior Ofisina di Turismo di Kòrsou (CTB) ta yuda promové e festival den su merkadonan prinsipal. CTB den estrecho kolaborashon ku Fundashon Bon Intenshon ta traha huntu pa un promoshon promé, durante i despues. E aña aki CTB a invitá un total di 26 zjurnalista ku a bin di; Aruba, Brasil, Canada, Colombia, Estádos Unídos, Sürnam, i Venezuela pa kubri CNSJF 2015.

Ademas di kubri e festival, e prensa invitá a haña oportunidat di konosé algun di e atrakshonnan di mas nobo ku nos isla tin di ofresé. Tur e promoshon ku lo bin komo resultado di e kobertura di CNSJF 2015 lo ta base pa kuminsá promové CNSJF 2016 ku ya a ser konfirmá. Pa ‘host’ tur e prensa internashonal ta danki na kolaborashon di nos partnernan di turismo i e tim profeshonal di CTB ku tin 26 aña di eksperensia pa loke ta ‘anfitrion’ di prensa internashonal. Pabien na Fundashon Bon Intenshon ku otro eksitoso festival.