Kompetensha di diskurso di CTB i JCI

...E ganador lo representá Kòrsou durante Caribbean Tourism Youth Congress...
WILLEMSTAD – 22 di yüli 2015 - Resientemente Ofisina di Turismo di Kòrsou (CTB) huntu ku JCI United Citizens of Curaҫao (JCI UC) a lansa e proyekto di The Golden Voice of Tourism Youth Congress. Meta di e proyekto aki ta pa selekshoná un representante di Kòrsou pa partisipá na e Caribbean Tourism Youth Congress.

E aña aki CTB den kolaborashon estrecho ku Caribbean Tourism Organization (CTO) tin e honor di por organisá e Konferensia di Estado Industrial 2015 (State of The Industry Conference) ku ta bai tuma lugá aki na Kòrsou den luna di òktober próksimo. E konferensia ta trata tópikonan di interes relashoná ku desaroyo di turismo i ta konta ku partisipashon di diferente aktor internashonal relevante pa e industria i demas interesadonan. Durante di e konferensia ta tuma lugá e Caribbean Tourism Youth Congress kual ta un kongreso di turismo pa hóbennan di Karibe. E hóbennan lo sinta huntu i diskutí riba diferente tópiko ku tin di haber ku turismo. E ganador apsoluto ta bira embahador di turismo di Karibe pa un aña largu. Promé ku e kongreso tur hóben partisipante ta bishitá vários lokalidat turístiko pa nan por konosé nos pida baranka mas mihó.

Apesar ku Kòrsou tin vários aña ta partisipá e aña aki sigur ta unu speshal komo ku e konferensia i kongreso tur dos ta tuma lugá na Kòrsou. Pues meskos ku tabata e kaso den pasado e aña aki tambe CTB ta en buska di un hóben dinámiko i ku hopi kurashi pa por representá nos dushi isla Kòrsou. E hóben mester ta entre 14 pa 17 aña i mester por dominá e idioma ingles hopi bon. CTB huntu ku JCI UC ta bai proveé un preparashon di un tèrmino di tres siman na tur e partisipante di Kòrsou. Pa ta mas eksakto un total di 16 hóben lo kompetí den un kompetensha di diskurso te ora selektá un ganador. Promé ku e dianan di kompetensha tur hóben lo risibí tres tipo di tayer. Di e forma aki CTB i JCI UC ke kontribuí ku formashon di kada partisipante i garantisá kalidat di e kompetensha.

Djasabra awor 25 yüli hóbennan ku ta interesá por registrá na Biblioteka Nashonal Kòrsou di 10’or pa 12’or òf na Chit Chat Cafe na Mensing’s Caminda di 1’or pa 3’or.

Tur hóben ku registrá ta risibí un orario pa un oudishon kaminda nan lo por demostrá nan abilidat pa por representá Kòrsou. Esaki ta tuma lugá djasabra 1 ougùstùs 2015 di 10’or pa 2’or na La Tentashon.

Pa mas informashon por bishita www.facebook.com/uccuracao òf www.facebook.com/Dushihende