Kòntròl di BAB na apartamentunan ku ta keda di hür ku turista

WILLEMSTAD- 3 novèmber 2016 – Resientemente Ofisina di Turismo di Kòrsou (CTB), a yama un rueda di prensa pa asina duna informashon di e programa di sertifikashon pa apartamentu i tambe kumplimentu di pago di OB di parti di sektor di akomodashon. Na e rueda di prensa a partisipá tambe Departamentu di Inspekshon di Impuesto, CITI (Curaçao Innovation & Technology Institute) i CHATA.

Pago di OB di parti di sektor di akomodashon
Entrante luna pasá un tim di BAB a kuminsá bishitá apartamentunan ku ta keda di hür ku turista pa kontrolá si esakinan ta kumpli ku e obligashon di paga OB. OB ta e loke ku mester keda kobrá pa estadia di durashon korto den hotèl, apartamentu priva i partikulir i tambe timeshare. Manera a keda anunsiá na kabamentu di 2015 dor di Gobièrnu di Kòrsou entrante promé di yanüari 2016 último, Departamentu di Inspekshon di Impuesto ta esun enkargá ku ‘heffing’ di e OB di 7% (ántes logeergastenbelasting). E pago mester keda hasí promé ku dia 16 di kada luna. E parti di kobransa ta den man di Landsontvanger. Kartanan di opheshon mester keda entregá na Departamentu di Inspekshon di Impuesto. Pa mas informashon por pasa personal na Afdeling OB (promé piso) na Departamentu di Inspekshon di Impuesto òf bishita www.belastingdienst.cw òf yama number di telefon 734-2570.

Sertifikashon di apartamentu
Pa loke ta trata e aspekto di sertifikashon di apartamentu a keda anunsiá ku solamente apartamentunan ku inskribí i paga pa partisipá na e programa di ouditoria di CTB promé ku 1 di yanüari 2017 lo por bai riba e wèpsait di CTB esta www.curacao.com. Apartamentunan ku aktualmente ta riba e wèpsait i no inskribí pa partisipá na tempu lo no aparesé mas riba e wèpsait entrante 1 di yanüari 2017. Na luna di mei último a anunsiá introdukshon di e programa di sertifikashon dirigí riba sektor di hospitalidat i turismo. E ophetivo di e programa aki ta pa promové i mantené kalidat di empresanan ku ta ópera den industria di hospitalidat i turismo. Komo parti di e programa a start ku ouditoria pa apartamentunan ku ta keda di hür ku turista. E programa ta basá riba stándartnan di kalidat rekonosé den nos merkado lokal i tambe internashonal. E kontròl di kalidat lo sosodé kada 2 aña dor di CITI. Aparte di keda inkluí riba www.curacao.com i disfrutá di e posibilidatnan di promoshon ku esaki ta brinda tin diferente otro benefisio mas manera entre otro partisipashon na aktividatnan di merkadeo tantu lokal komo internashonal i uso di e símbolo di e programa ku ta para pa kalidat. CITI ta enkargá ku ehekushon di e programa di sertifikashon. Pa inskribí subi www.citi.cw òf yama number di telefon 738-6299.