Kòrsou anfitrion di 'Caribbean International Tourism Safety & Security Conference 2015'

WILLEMSTAD- 20 di mart 2015– Durante di un rueda di prensa Ofisina di Turismo di Kòrsou (CTB) a anunsiá ku próksimamente Kòrsou lo ta anfitrion di ‘Caribbean International Tourism Safety & Security Conference 2015’. Seguridat i protekshon den turismo ta di vital importansia ora ta papia di brinda kalidat den turismo. Mas ku kualke aktividat ekonómiko, e éksito òf frakaso di un destinashon turístiko ta dependé di e kapasidat di por ofresé un ambiente ‘safe’ na bishitantenan for di eksterior. Echo ta, ku den e último dékadanan e aspekto di seguridat i protekshon den turismo a risibí un atenshon enorme. Debí na e partikularidat aki CTB den koperashon ku Tourism and More Inc. ta organisá un konferensia internashonal riba e tópiko menshoná kual lo tuma lugá di 24 pa 26 di yüni próksimo na WTC. Na e rueda di prensa a hiba palabra Minister di Desaroyo Ekonómiko, sr. Stanley Palm, sr. Humphrey Josefa den representashon di Minister Navarro, Dr. Peter Tarlow (Tourism and More Inc.) i sr. Ritzel Godfried (CTB).

E meta prinsipal di e konferensia ta pa tur partisipante risibí konosementu dor di interkambio di eksperensia i alabes e konferensia lo sirbi pa oumentá e konsiensia tokante seguridat i protekshon den turismo den region Karibe. Ademas di esaki e konferensia lo brinda e oportunidat úniko di sera konosí ku profeshonalnan di seguridat rònt mundu. E konferensia lo kuminsá dia 24 di yüni ku un seminario eksklusivamente pa públiko lokal. E seminario lo keda tratá komo un debate interaktivo tokante ‘TOPPs’ (Tourism Oriented Policing & Protection Services). Dianan 25 i 26 di yüni tantu sektor públiko komo privá huntu ku partisipantenan internashonal lo bini huntu pa seshonnan informativo relashoná ku seguridat i protekshon den region Karibe. Tópikonan ku lo keda tratá durante e konferensia ta entre otro: Vision of the Caribbean, Effective Communication Management in case of Tourism Security Crisis, Cruise Security, Tourism Challenges for the Caribbean, Tourists Health, Festivals Security, Human Trafficking, Crime as a factor in a Tourism-based Economy i Passenger Experience.

E konferensia lo ofresé partisipantenan informashon nobo i e mihó práktikanan pa un region karibense mas sigur. Echo ta, ku e turista ta konsiderá Karibe e destinashon di su soño pa kual motibu mester por garantisá su seguridat. Organisando un konferensia manera ‘Caribbean International Tourism Safety & Security Conference’ Kòrsou ta posishoná su mes komo un pais ku ta mira e importansia di e tópiko aki. CTB ta ekstendé un invitashon na tur persona/organisashon ku di un manera direkto o indirekto ta envolví ku e sektor di turismo pa forma parti di e konferensia dianan 24, 25 i 26 di yüni próksimo. Pa mas informashon i pa registrá bishita http://www.curacao.com/ssc/.