Kòrsou anfitrion di ‘CTO State of the Industry Conference 2015’

...Kresementu pa medio di inovashon...
WILLEMSTAD- 8 di òktober 2015 – Di 21 pa 23 di òktober próksimo, Kòrsou lo ta anfitrion di ‘CTO State of the Industry Conference 2015’ (SOTIC). E konferensia ta reuní profeshonalnan di turismo den Karibe, personanan enkargá ku planifikashon di maneho, sosionan stratégiko den sektornan públiko i privá, akadémikonan i profeshonalnan di biahe na nivelnan haltu, kendenan lo diskutí, identifiká posibel solushonnan i desaroyá akshonnan ku ta benefisiá e industria turístiko di Karibe. E oradornan internashonal i esnan den region lo proponé e mihó práktikanan i strategianan relashoná ku diferente tema ku ta fundamental pa kresementu di turismo di Karibe. Tur esaki ku bista riba desaroyo di un industria turístiko sostenibel ku lo posishoná Karibe komo e destinashon turístiko di mas deseá. E tema di e aña aki: “Caribbean Tourism: Growth Through Innovation”(Turismo Karibense: Kresementu pa medio di inovashon), lo brinda partisipantenan informashon tokante tendensianan aktual ku ta dirigí turismo, ideanan inovativo, strategia i produktonan ku por keda introdusí den e merkado i maneranan kon pa revolushoná e produkto pa oumentá rentabilidat di invershon.

E konferensia ‘CTO State of the Industry Conference’ e aña aki lo tin komo orador di honor sr. Robin Haynes, direktor ehekutivo di JetBlue. Sr. Haynes lo elaborá riba algun di e faktornan ku ta influensiá futuro di e industria turístiko. Tambe lo tin diferente seshon i tayernan interaktivo. Dia 21 di òktober e konferensia lo inisiá ku un seremonia ofisial i un resèpsi di bon bini pa tur partisipante. Algun di e tópikonan ku lo keda tratá riba 22 i 23 di òktober ta: ‘Visioning the future –Tourism 2025’, ‘Get Personal – Engagement Marketing For Better Business’, ‘Facilitation: At Your Service – Making Travel Easier’, ‘The Age of Innovation – Increasing ROI’, ‘Business Opportunities: Teach Me to Niche’, ‘Marketing to the Generations’ i ‘Creative Tourism’. Ademas di esaki e konferensia lo inkluí tambe unkongreso di turismo pa hóben. Hóbennan di vários pais ku ta miembro di CTO lo duna nan kontribushon na e diskushonnan ku lo tin durante e kongreso pa hóben, un di e vehíkulonan usá pa CTO pa enkurashá e hóben pa konsiderá un karera den turismo. Durante e kongreso pa hóben Kòrsou lo keda representá pa Johannah Rosaria kende resientemente a gana e ‘Golden Voice Competition’. E kompetensia aki a keda organisá dor di CTB ku e propósito pa skohe e representante di Kòrsou.

Ken lo mester asistí na e konferensia aki?
Profeshonalnan di benta i merkadeo, konseheronan, guianan turístiko, edukadornan, agentenan di servisio na kliente, imigrashon, duana, shofùrnan di taksi, studiantenan di universidat, kompanianan di energia i di utilidat, agensianan di Car Rental, kompanianan di servisio industrial, komersiantenan i tur esnan ku ta interesá den e tópikonan ku lo keda tratá.

Kon pa partisipá?
Registrashon pa partisipá na tur e dianan ta $250 i registrashon pa un dia so ta $150. Pa mas informashon relashoná ku e programa por bishitá: www.curacao.com/sotic òf yama 434-8200.

Bo no por pèrdè SOTIC; e evento pa lidernan den turismo di region Karibe.