Kòrsou a demostrá diversidat durante ‘Curaçao InfoMart 2015’ na Sürnam

WILLEMSTAD- 16 di aprel 2015– Resientemente Ofisina di Turismo di Kòrsou (CTB) a organisá e di dos edishon di Curaçao InfoMart na Sürnam. E feria di biahe a konta ku un bon públiko ku tabat’ei presente pa asina konosé e diversidat ku Kòrsou tin pa ofresé. E lugá di parker di Hotel Torarica a keda kubrí ku un tènt grandi i den e plafon tabatin arkonan di lus pa duna e turista surinameño un bista kon nos brùg Emma ta keda iluminá anochi. Un banda musikal i brasbènt den kaya a trese un parti di nos pais pa e públiko surinameño.

Partnernan den sektor di turismo a djòin CTB na e Curaçao InfoMart i a hasi uso di e oportunidat pa presentá nan pakete- i preisnan atraktivo. E partnernan aki tabata: Renaissance Curaçao Resort & Casino, Trupial Inn Hotel & Casino, Avila Hotel, Livingstone Jan Thiel Beach Resort, Papagayo Beach Resort, Howard Johnson Curaçao Plaza Hotel and Casino, Plaza Hotel Curaçao i Sunscape Curaçao Resort, Spa & Casino. Scoobys Tours i Pelican Boat Tours tambe a forma parti di e tim di Kòrsou e aña aki. Tambe a hasi uso di e oportunidat pa duna informashon di e diferente festivalnan musikal ku lo bai tuma lugá e aña aki na Kòrsou, entre otro: “Viva La Musica Latina Curaçao 2015”, “Curaçao International BlueSeas Festival” i e ya bon konosí na Sürnam “Curaçao North Sea Jazz Festival”.

E agentenan di biahe na Sürnam ku ta Waldo’s Travel, Rasonic Travel, Ara Travel, Does & Cadushi Tours i Satyam Travel a presentá nan paketenan atraktivo pa bishitá Kòrsou na e bishitantenan di e Curaçao InfoMart. InselAir i Surinam Airways tambe tabata presente i a regalá e públiko presente diferente premio. InselAir a promové tambe su 7 buelonan pa siman entre e 2 paisnan. Pa kompletá e eksperensia a ofresé diferente pasaboka krioyo kombiná ku kòktelnan trahá ku e likùr Blue Curaçao. E funchi hasa ku keshi i sous krioyo a keda prepará pa e kòki di Hotel Torarica ku a biba 16 aña na Kòrsou.

CTB por mira bèk riba otro evento bon bishitá na Sürnam i ku sigur a laga un impreshon positivo serka nos futuro bishitantenan surinameño.