Kòrsou a mustra públiko kiko ta pasando #RightNowInCuracao na New York Times Travel Show

WILLEMSTAD, 1 di febrüari 2017 – Ofisina di Turismo di Kòrsou (CTB) a fasiná poblashon di New York ku un ‘Mosaiko di Kòrsou’, un imágen enorme di nos famoso Handelskade. E mosaiko a konsistí di un kantidat di potrèt ku hende individual a saka i publiká riba nan profile públiko di Instagram ku e hashtag #RightNowInCuracao.

CTB ta masha kontentu ku e sosten risibí den fin di siman, ku e kampaña fotográfiko di #RightNowInCuracao. CTB a invitá e poblashon lokal, bishitantenan, e públiko presente na e New York Times Travel Show i fanátikonan di Kòrsou en general pa pone un potrèt di nan mes òf di un paisahe di Kòrsou riba Instagram. Durante e evento di tres dia, Kòrsou a usa mas di 3,200 di e potrètnan akí pa krea e mosaiko enorme.

E New York Times Travel Show di 2017 a tuma lugá di 27 pa 29 di yanüari 2017 na Jacob K. Javits Center, New York City. Kòrsou su presensia na e èkspo akí tabata un chèns ideal pa hala atenshon di konsumidó di tur parti di e asina yamá ‘tri-state area’. Huntu ku CTB, tabatin vários partner i boluntario di Kòrsou, manera Blue Bay Curaçao Golf & Beach Resort, Livingstone Jan Thiel Resort, Papagayo Curaçao, Renaissance Curaçao Resort & Casino i Santa Barbara Beach & Golf Resort. Ademas di yuda reforsá e branding di Kòrsou na e èkspo, e partnernan akí a apoyá nos vuelonan non-stop ku JetBlue tambe, aserkando e konsumidónan di New York personalmente ku oferta spesial i trep di regalo.

Durante e tres dianan di e evento akí, e stènt di Kòrsou a entregá mas di 5.000 material di propaganda i a risibí mas di 216.892 klek riba medionan sosial, di bishitante ku a usa e hashtag #RightNowInCuracao.

Banda di e èkspo pa konsumidó, CTB a partisipá tambe na e konferensia turístiko yamá New York Times Travel Industry Conference, un programa edukashonal ekstenso formulá pa profeshonalnan den ramo di turismo. Huntu ku Caribbean Tourism Organization (CTO), Kòrsou a tene un presentashon na mas ku 100 agente di biahe registrá den e área di New York, kaminda ku a mustra esnan presente kiko ta hasi e isla akí un destinashon úniko.

CTB ta gradisí un i tur ku a duna un aporte poniendo nan bunita potrètnan di nos ‘Dushi Isla’ online. Pronto lo manda e mosaiko Kòrsou pa kolog’é na e ofisina di CTB.